豬來窮 狗來富 貓來著麻布
【圖／廖千慧；文／何石松】
發音人：何石松（海陸腔）
豬來窮，狗來富，貓來著麻布，表面意思係講：頭擺農業社會，甚至於上年時代對豬狗貓介一種看法。認為豬仔無意無思來到屋下，會帶來貧窮介衰運；係講有狗走等來介時節，該就可能係會富貴介頭彩；萬一，係講貓仔撞等來屋肚，該就芋荷纏頸－－該衰唷，怕有不幸介事情發生呢，愛多注意正好。不過，深層一步來講，問題毋在豬狗摎貓仔，係在人。人，愛正，愛有能力，正可以決定豬狗摎貓仔介命運，毋係豬狗摎貓仔可以預測人介窮富摎不幸。
所以，豬來窮，狗來富，貓來著麻布，重點係人，愛有能力解決前來介豬狗摎貓仔。處理得好，豬來貓來也會富，所謂畜大豬，把門風；處理毋好，狗來貓來也會窮，就毋只著麻布定定。主要愛了解「來」介情況，在上早時代，仰般解決人摎猛獸介問題，了解上古時代社會介原貌，可以發現禮俗介來源。
毋過，斯係因為這句諺語，盡多人就當希望狗來富，毋希望豬來窮，更無歡迎貓仔來，其實，事情可能無恁簡單，哪可能講豬仔來，斯會窮，狗來斯會富，貓來斯會著麻布？何況，頭擺農業社會，人畜等介豬仔，仰可能來到屋下？狗愛掌屋，貓愛打老鼠，各有其主，實在無麼介理由會走到屋下來，乜毋係講這三種動物一下來，吾裡就會仰般，實在無麼介可能，該又仰般有這個講法呢？
原來，這句諺語也有幾種講法。在明朝江盈科介《雪濤談叢》斯講，佢介家鄉有句諺語：「豬來窮家，狗來富家，貓來孝家。」所以，豬仔摎貓仔，係人介禁忌，看著，一定愛摎佢㓾忒。但係，庄肚有個張宗聖博士解釋講，事情毋係恁樣，係因為窮人屋下本成斯當苦，連門都無，四門透底，壁穿空，瓦爛忒，恁堵好，撞上撞下介山豬，遇著落大水，斯尋空壙，撞落這無門介人屋僑水，斯像山豬落菜園共樣，麼介斯蹂淨淨，蹥淨淨，毋係豬來窮，係佢本來就貧窮，係講有錢人屋下，佢仰落得去？。
看該有錢人屋下，三餐豬豬肉肉，澎澎湃湃，伸介骨頭菜湯腳不勝多，狗群濞騷前來，好心主人斯會分兜佢食，慢慢，狗就變人介好朋友，毋係狗來富，係佢本成就富啊！講著貓來著麻布，共樣，係佢屋下已經有不幸事情咧，貓仔正來，毋係貓仔來正著麻布。毋過，這位介貓仔，毋係貓仔定定，包含了盡多介動物，講貓仔來，係歷史留下介現象，這就愛追溯最早介喪葬禮俗。
原來，上早人類毋知麼介安到死亡，突然之間發生咧，毋知仰結煞正好，遽遽通知親戚朋友，好來𢯭手。斷烏以後，盡多介猛獸鼻著死人介味道，就歸群歸群擠等來，大家就拿起弓箭，來射該兜動物，一直到今，去喪家拈香，還安到弔喪，係去幫忙慰問介意思。正會講，貓來著麻布。講貓仔，係一種代表，因為目前還保留一隻習慣，係人老之後，第一步就愛摎貓仔關起來，提防貓仔有不利死者介行為，可見，係先有不幸事件，貓仔正來，毋係貓來正著麻布，。
除這以外，也有人講：「豬來貧，狗來富；貓仔來，開寶庫。」「豬來貧，狗來富，貓來開質庫。」意思差不多共樣，重點係人，毋係豬摎狗。何況，這下，豬仔分人關在豬欄肚，狗貓也畜在屋下，其他動物，也無辦法摎人類競爭，全無豬來窮，狗來富，貓來著麻布介問題咧。但係，做毋得毋記得，上早人類少動物多，暗晡頭拿等弓箭，防止猛獸攻擊介情形，係一種「觀今宜鑑古，毋古不成今」介反想。
※本文的「介」為大眾通用的「的」，同教育部訂的「个」之意。
