閒談南北兩畫家
【文／鍾榮富／南臺科技大學應用英語系講座教授】
發音人：鍾榮富（南四縣腔）
這愛閒談个對象係南部个曾文忠先生同北部个張秋臺校長，愛談个內容主要係佢等兩儕个繪畫風格、內容、同客家味緒。
所有个藝術創作，不論透過寫作、繪畫、音樂各種方式，最尾个作品多少都會反應創作者內心个想法、看法、同感受，故所對作品去閱讀，讀者會有相對个感動，這在閱讀上有人安到讀者同作者之間个溝通。本文就係想寫下個人在欣賞這兩家作品當下，內心个感受同想法。當然，會特別選這兩作家主要係因為佢等兩儕都係客家前輩，都係獻身教育，都係為了藝術熱誠，最後佢等共樣用畫筆留下南北客家村莊个樣貌、記憶、同畫家個人个註解看法。
愛談畫家，最好个辦法還係先看作品，對作品出發，慢慢仔再來談佢等創作个背景、過程、辛酸或者快樂。後背兩張就係張秋臺校長个作品，因為篇幅受限，先看兩張，以後有機會再慢慢仔看其他个作品。
先看左手片第一張圖，畫面頭前就係彎彎斡斡个牛車路，一下仔就彎入禾田後背吔，毋過路尾還係帶等悠遠个想像，想像路个悠遠，想像田野个遼闊。金黃金黃个禾串，一路黃到山腳下，充滿了秋收飽滿个未來。路个右手片，一層還過高个田坵，表示這係窩壢所在，故所有梯田个模樣，深含農民同天爭地个卑微同勞苦。畫个遠方係一層又一層个山景，加上浸青个天頂同歸大片个煙雲，分人恬靜、幸福个氣氛。其他肚中个矮樹，前後錯落，左右交叉，顯出大自然野生植物个韌性、活力、同人為个和諧。
簡單看一幅圖，做得看出張校長在畫面布局、自然書寫、景物捕捉个訣竅，同時做得對佢个筆觸，落筆細幼，線條精緻，勾勒出來个寫實畫面，反映作者多年个筆力同觀察。這毋係外地人來到客家田園寫生一下晝，就可以達到个境界。一張禾田圖代表客家子弟在禾田肚沉浸个結果。
右手一張係頭擺客家婦女拈禾串个圖樣，作風含意同米勒个名畫〈拾穗〉多少共樣，毋過在表達方面，張校長盡量顯出佢自家个風格。(伸个下一擺正來講。)
