去法院
【圖、文／徐佳妤／臺北市客語支援教師】
發音人：徐佳妤（南四縣腔）
生到恁大，亻厓第一擺去法院。
記得舊年十二月，同往擺共樣，倈仔下課就會歸到屋下咧！
LINE~亻厓个手機仔一響，「媽，亻厓著傷咧，你愛陪亻厓坐救護車。」心肝頭忸一下1。「阿洋，你在哪仔？」「亻厓在樓底下。」緊拚拚吔2，擐等皮包仔，一下樓，警察、救護車既經來吔，看著倈仔个膝頭鑪溜皮，血流血著，得人驚，毋知發生麼个事情？
倈仔講：佢過大路个時節，既經轉青燈咧，結果，忒急性，毋知愛先看，還有車仔來來去去無就行過去，恁堵好，一臺引擎來毋擎頓恬撞著佢，佢嚇著，就仆落去3，又恁堵好，該日又著短褲，啊哦，正經蓋痛啊。該騎引擎个婦人家乜嚇著，毋過，看著倈仔黏時就企起來，佢覺著無事情，就騎走咧。
「亻厓當然愛共快跋䟘起來啊，係無，會分後背个車仔碾著呢！」著哦，好在，後生人反應遽，乜該載神明有保祐，命大咧。去到醫院掛急診，翕電光(照X光)、傷口消毒後又擦藥仔，舞吔兩三點鐘，既經斷烏咧，「媽，亻厓愛告佢『車禍瀉走』(肇事逃逸)還有過失傷害！」倈仔氣哱哱吔4講。「你確定愛告佢？一息仔著傷，毋怕啦，原諒佢，好無？」「亻厓無愛！佢害亻厓著傷呢。」「毋過，你忒急性過大路，乜無細義啊。」落尾，該日，還係去警察局做車禍筆錄。
今年，一收著「檢察官起訴書」，兩子哀共下上網查資料，愛仰仔寫「刑事附帶民事訴訟起訴狀」，無一久就收著「法院刑事庭通知書」。該日，一入去法院，堵起勢，有調解人員來調解，正知該婦人家經濟毋好，亻厓同倈仔決定降低賠償个錢。婦人家一句：「失禮，敗勢」該時，倈仔放下「讉」乜原諒佢咧。亻厓想：係講，無行這一段法院路，倈仔个慍悴，會庰在心肚一生人無？亻厓，毋知......。
1 忸一下nugidˋha:嚇一跳。
2 緊拚拚吔ginˋ bia bia eˊ:喻急迫。
3 仆落去pugˋ log hi :臉朝下跌倒。
4 氣哱哱吔hi puˊ pu ˊ eˊ:氣呼呼的。
