來讀馮輝岳个《雲乜愛睡目》
【圖、文／徐碧美／國立中央大學客家語文碩士班】
發音人：徐碧美（四縣腔）
你知雲睡目係麼个樣相無？你知阿爸个面做麼个會鹹鹹無？熱天个英雄係麼儕？金魚仰會變做王子、公主？《雲乜愛睡目》係馮輝岳先生在舊年年底出版个客語兒童詩歌創作集，總共收錄24首童謠、童詩。畫圖个人係馮先生還在讀國中个孫女「馮若嵐」。阿公寫詩，孫女畫圖，好事成雙。貼心个係，每一首都有完整个華語翻譯，四縣腔摎海陸腔个拼音，更加適合不同需要个讀者。
續下來，恩就來讀兩首作品，第一首係童詩：
〈番薯个心〉
番薯番薯，
生到泥竇肚。
寒天來了，
改起寡寡泥个番薯，
洗淨拿來烳，
食了正知
番薯熱情个心，
包在金黃个肉肚。
哇！吂食到番薯，就感覺番薯金黃个熱情，燒暖恩兜个心。這首詩係用擬人法寫番薯个熱情。你識堵著熱情个人無？熱情个人，就像日頭，你跈等就做得感受到厥个溫度。但係番薯个熱情，係慢慢仔，緩緩仔。對改番薯、洗番薯、烳番薯、食番薯，連等幾下隻動作，作者利用幾下隻動詞，由外而內，分恩兜看到番薯个心──原來番薯个熱情係包等个、囥等个，愛剝開來正感受得呢，實在當有意思！恩輒常講，文如其人，番薯个心乜讓我聯想到馮先生个作品同為人──潤物細無聲。
第二首愛欣賞个係童謠：
〈芎蕉〉
芎蕉香，
芎蕉黃，
這莢短，
該莢長，
短个自家食，
長个請姑丈。
童謠个主要形式係句仔較齊，多用三言、五言、七言。愛押韻。涵意較淺。內容主要寫物。大約來講，童謠个語言特色係「重複」。聲音个重複(押韻ong：香、黃、長、丈)；句型个重複(芎蕉……芎蕉……；這莢……該莢……；短个……長个……)。這兜重複形成節奏，形成童謠好聽、好記、好唸、好搞个魔力。另外，這首童謠難得个係，毋單淨寫「物」，盡尾還做得摎「人」產生情意个連結。
看起來簡單个童謠、童詩，愛寫到好、寫到巧，寫到適合細人仔吞落肚、吞落心，其實無恁該呢！亻厓認為，馮先生作品有一個特色安做「節制」。佢知讀者係細人仔，故所用字毋會忒難、忒深，字數毋會忒長，這乜係創作者个貼心。
講仔恁多，不如遽遽去買一本、借一本《雲乜愛睡目》，讓客語个音色，語言个節奏，文學个美感在若个嘴項「讀」出聲來。
