楊梅泉水窩江夏堂建築个藝術風華（四）
【圖、文／徐貴榮／國立中央大學客家語文暨社會科學學系兼任助理教授】
發音人：徐貴榮（四縣腔）
屋外个藝術裝置，包含剪黏、交趾陶、石雕、字畫、彩繪恁多。彩繪除忒在屋肚子孫廊左右門楣頂个「堆花」以外，還有橫屋「餘慶居」門額左右个彩繪、書法「清風」，（圖25）、「龍飛」（圖26），「耕讀居」門額兩片个彩繪、書法「鳳舞」（圖27）、「明月」（圖28）。
圖25 「餘慶居」門額左片彩繪、書法「清風」（2021.08.28攝）
圖26 「餘慶居」門額右片彩繪、書法「龍飛」（2021.08.28攝）
圖27 「耕讀居」門額左片个彩繪、書法「鳳舞」（2021.08.28攝）
圖28 「耕讀居」門額右片个彩繪、書法「明月」（2021.08.28攝）
剪黏同交趾陶藝術，係請著當時盡有名个蘇揚水大師來做个。剪黏藝術最打眼个就係屋簷个兩條魚仔，這魚仔安到「吐水」。仰會做這吐水呢？主人講：「因為祖公牌在中央，落雨个時節，水潑等下，從正門看啊出去，像祖公『目汁瀾泔』，故所愛同佢擋起來，水畀在兩片出。在兩片出个時節落下來，又有人講祖先『雙淚垂』，該愛仰結煞呢？就做兩隻鰲魚『吐水』，該就無共樣了唷！」盡早第一代做个「鰲魚」，係用剪碗析做个，安到『獨占鰲頭』，非常个有意思。後來舊吔壞忒，請个師傅毋會做，研究過後，背尾正改做『鯉嫲噴水』，變到『魚躍龍門』係第二代（圖29）。這係化學產品做个，會褪色也當容易壞忒。到無幾久又做過，係第三代咧！看着衝新，嗄分人試着有一息仔『鋒芒畢露』个感覺。」（圖30）
圖29 拆下來个第一代吐水「獨占鰲頭」樣貌（左），
第二代吐水「魚躍龍門」樣貌（中、右）。（2016.06.25攝）
圖30 屋簷「吐水」剪黏藝術，一對鯉魚，象徵「魚躍龍門」（2023.08.21攝影）
剪黏藝術盡重要个在屋棟，全係用碗剪析來黏，故所愛用當多碗來剪，到今還當耐新。龍片有麒麟、牡丹、鳳凰，安到「三王圖」。仰般講呢？「麒麟獸中王」，「牡丹花中王」，「鳳凰鳥中王」，意思係「出類拔萃」，希望子孫「頭角崢嶸」、「三元及第」（圖31）。虎片有蓮花、牡丹、白鶴（鷺鷥、仙鶴），表示「一路連科」，考試穩穩仔上。（圖32）兩片落峨間屋棟有牡丹、麒麟、鳳凰、菊花這兜，表示「富貴吉祥」。（圖33）
圖31 正身屋棟龍片剪黏「三王圖」，希望子孫「頭角崢嶸」、
「三元及第」（2023.09.26彭雙燕攝影提供）
圖32 正身屋棟虎片个蓮花、白鶴（鷺鷥）、牡丹，希望子孫
「一路連科」、「考試穩上」。（2023.09.26彭雙燕攝影提供）
圖33 落峨間屋棟有牡丹、麒麟、鳳凰、菊花這兜，表示「富貴吉祥」。
交趾陶藝術表現在兩片个「燦景」，還過「水車垛」。龍片「燦景」裡背有一個老人家拿一本書，有一個後生仔擐等一隻燈籠，安到「孔明夜送出師表」。諸葛孔明係三國時代蜀漢宰相，「鞠躬盡瘁，死而後已」，代表「忠」。底下有桃仔、柚仔、黃梨、另外一粒跌忒咧，這四種果子，表示「福壽興旺」。（圖34）「水車垛」有一群細妹仔，還有一個將軍，係「花木蘭代父從軍」，代表「孝」，連結燦景个「忠」，（圖35）就係「左凹壁」个「忠孝」兩字。（圖5）
圖34 龍片「燦景」，「孔明夜送出師表」代表「忠」。
下背四種果子表示「福壽興旺」。（2016.06.25攝）
圖35 龍片「水車垛」，「花木蘭代父從軍」，代表「孝」。（2016.06.25攝）
虎片「燦景」分玻璃揜等，濛濛較看毋清楚，這玻璃有百空年欸無動過佢，裡背生水點，捽毋着，專家講係「狄仁傑望雲思母」。狄仁傑係武則天時代有名个宰相，做人廉明耿直，執法公正，代表「廉」，底下有包黍、瓠仔、香櫞，另外一粒跌忒咧，這四種菜果，象徵「多子多孫」。（圖36）「水車垛」有一個紅面个人，騎一條紅馬仔，就係「關雲長保二嫂過五關」，「關羽顧嫂」，當有義氣，代表「節」，（圖37）連結「右凹壁」个「廉節」兩字。（圖6）
圖36 虎片「燦景」「狄仁傑望雲思母」代表「廉」。下背四種菜果，
象徵「多子多孫」。（2016.06.25攝）
圖37 虎片「水車垛」，「關雲長保二嫂過五關」，代表「節」。（2016.06.25攝）
這左右「燦景」、「水車垛」兩片連結起來，意思就係希望子孫愛「忠孝廉節」，也就係反應客家人一溜裡來傳統盡重視个「忠孝節義」加「清廉」。
（本文吂完，下隻月11月初一請待續）
