豬撐大人稱壞 狗撐變妖怪
【圖／廖千慧；文／何石松】
發音人：何石松（海陸腔）
豬撐大，人撐壞，狗撐變妖怪，意思係講畜豬仔，愛分佢食飽飽，正會當遽肥，當遽大，可以賣錢，好來相添所費，有好打幫；毋過，豬仔愛食飽，人係撐昶飽，該斯會食壞人，嚴重兜仔，還可能有性命介危險；所畜介狗，係講撐昶飽，該斯會無正常，動啊著斯狂吠，像妖怪樣。所以，豬仔愛食飽，人就做毋得食昶飽。這係一種中庸之道介養生文化，係講好好來做著正常介飲食，不論到哪，可以使一年四季，身體平安，六畜興旺，和諧順利。
老古人言講：「窮人莫斷豬，富人莫斷書」，所以，頭擺農家人，屋下大部分都有畜豬仔，畜豬仔斯希望佢遽遽大，愛豬仔大，就愛分佢食著足，食著好，更愛分佢食著飽，畜豬仔像積錢笐共樣，長扯愛剁豬菜，炆番薯，泌糜飲，留菜湯腳，凡係人食有伸介，全無打爽，全部攪到共下，分佢食。人成時會枵著，但係，豬仔絕對無分佢枵介，因為，愛希望豬仔煞煞大，正能夠賣錢，一年透天，就打幫賣豬仔介錢，來做細人仔介註冊費，平常介賒數，全部解決咧。所以，豬仔愛越多，越大條，越重越好，該就愛盡命牯分佢食，毋好細義，所以講：「豬撐大，過年較自在。」
當然，豬撐大，無一定係為了錢，佢係為了心中虔誠介信仰。比論講，逐年介中元普渡，所畜介神豬，毋係幾下百斤，就係千大零斤，分豬仔食到硬硬企毋起來。該兜神豬，正經係撐到大介，一日三餐，除了食，還係食。毋過，虔誠介主人，驚豬仔蚊叼蚊啄，特別摎佢吊蚊帳；驚佢昶熱，又摎佢安裝冷氣，成時，還摎佢爪㾂，洗身等等，分佢一隻好好食汁介環境，服侍佢阿公樣，唯一介目的，就希望佢遽遽大。因為，過槽香，所以畜豬仔愛畜加幾條，較肯食，所謂「人多無壞湯，豬多無壞糠」，豬仔畜多，佢就會矻斯食，搶等食，當遽大，也無一種頭牲，可以像豬仔樣，撐著千過斤恁大介，正經係「豬撐大，豬大把門風。」
豬仔可以撐大，但是，人就無辦法用撐介，一撐，身體就大受影響。煩勞你大人細子，絕對做毋得食昶飽，所謂「若愛兒平安。常帶三分飢摎寒」，該就係食飯愛食七分飽，分腸胃有消化介空間，身體健康平安，該就係「三分寒，三分飢，毋使去看醫。」係講食昶飽，得落毋得出，斯會當艱苦，企坐毋核，爬牆扡蓆，捼捼蹴蹴，無落無著。因為，「少食多滋味，多食損腸胃」，食昶飽斯像發大水共樣，一下之間，落恁多水，消化毋去，斯會山崩地裂，湓河湓崁，屋轉樹橫，橫架直架，哪位都狼離狼犁，身體仰會堵得著？所以講：「夜飽減損一日壽年，夜醉減損一月壽命。」再過加上「熬更守夜，銅鐵開花也會謝」，正經斯會人撐壞啊！
人會撐壞，就係因為食昶多，食昶飽，超過胃腸介負擔，係盡得人畏介事情。尤其係這幾年來，當流行可以盡命牯食介「大胃王」活動，看麼儕可以食等久，食等多，盡多後生人分該優待餳著，斯放勢食，全無一隻節制，毋知謹，結果嗄摎身體打壞，嚴重兜仔，命嗄無忒。比論講：日本大胃王高橋知成，因為常常食昶飽，30歲就撐死；菅原初代在10分鐘之內，食忒399碗公介麵，也撐死；印度一隻細徠仔，為了新台幣860個銀，愛食落50隻雞卵，在連食第42隻卵介時節，就硬硬撐死；台灣也有大學生在30秒內，食忒兩隻半介饅頭，也撐死，唉！這比人撐壞，還較嚴重啊！
講著狗撐變妖怪，係講狗摎人無共樣，日夜顛倒。斯係「狗無晝，貓無夜」，吾俚常常看著，狗貓在日時頭也在該睡目，係因為狗貓介暗晡頭，就係人介日時頭，所以，狗毋好分佢食晝，貓毋好分佢食夜。在日時頭，狗當愛睡目時節，你又分佢食，對佢係一種負擔。狗，係毋知節制介，有好食斯盡命牯食，萬一，又撐到昶飽，就會無正常，長扯無意無思就狂吠，分毋清主人抑係人客，都儘採吠。成時，星光半夜，無人無抵，佢也在該狂吠，像妖怪共樣，所以講：狗撐變妖怪。
既然人會撐壞，狗撐會變妖怪，敢講豬仔斯毋會撐壞？吾俚仰般無一點思量痛惜之心？總係想著自家介利益，無想著豬仔硬硬撐到企毋起來，毋知佢撐昶飽介艱苦，正經係撐到「牛皮做遮——難過日」啊！。其實，不管再好食介東西，人豬狗全愛節制，毋好食昶飽，食昶多。也係孔子講介「不多量」，愛堵堵好，能夠「食飯七分飽，病痛自然少」，就毋會有人撐壞，甚至於性命介危險，可以講係當好介養生指南，希望可以「東南西北方方利，春夏秋冬日日安」！
※本文的「介」為大眾通用的「的」，同教育部訂的「个」之意。
