客話書寫个樣式
【文／鍾榮富／南臺科技大學應用英語系講座教授】
發音人：鍾榮富（南四縣腔）
「客話」在台灣雖然分六腔，毋過各腔代表係有機會坐共下開會，現實最常看着个現象就係大家改用華語。換句話講，就係客人聚共下座談，談客家自家个發展、未來，還係無辦法講客話，這就係目前个現實。若係客人心胸過大兜仔，容忍度過闊兜仔，其實六腔客話差別還毋會到完全聽毋識个地步。就係有一兩個地方聽毋識，稍微解說就做得哩。毋單淨講話之間个溝通，就係未來个客語書寫，乜共樣愛容納各腔頭个特殊用詞，恁樣正會有「客語書寫」个未來。
各腔使用自家个詞彙，共同推廣客語書寫，到尾定著會發展出一種共同个「客語標準話」。其實華語、英語、義大利个書寫發展就係當好个借鏡。
英國人在十一世紀該時節，還無人用英語書寫。自從William the Conqueror (征服者威廉)在1066年進入英國做國王以後，將近有三百年个時間，大部分英國人个書寫都用法文，愛到喬叟个詩作出現，正正式有英文書寫。喬叟係倫敦人，自然用倫敦腔來寫。後來讓英文書寫壯大个莎士比亞，係倫敦西片个阿文(Stratford-upon-Avon)人，去過倫敦，當然大部分還係用佢自家个腔頭寫劇本。英文个書寫就恁呢慢慢吸收各種腔頭个詞彙，正發展起來个。
義大利早時用拉丁文書寫，愛到博迦秋(Boccacia)採用自家个方言寫「十日談」過後，正有人開始用「義大利文¬」書寫。博迦秋係吐司卡尼(Tuscany)人，故所義大利文以吐司卡尼个話為基礎，慢慢仔加入其他方言个作家，就恁呢形成今下个義大利文。
華語个白話文開始个時節，每一個人都用自家當地个話書寫，周作人有講「所謂白話就係藍青官話，本旦係南腔北調个，用「聽得識、寫得出」為標準，並無固定个形式，結果變做一種雜雜个語文，有文言乜有白話。」(雜文个路，這用客話翻寫。)故所老舍用北京土話，白先勇用典雅白話，鍾理和雜用客話，這兜都係華語書寫，對普通讀者無讀毋識个問題。
用這兜例仔為根據，做得看出來，未來个客話書寫定般愛容納四海大平安各腔頭个詞彙、用法、講法，慢慢仔讓客語書寫行自家个路，無需要去擋，乜無需要去要求愛用麼个腔。還記得當初亻厓接英文經典來做客語翻譯个時節，本想就愛用南四縣為本，後來出版單位認為還係建議改用四縣，個人感覺這係十分可惜个機會。照個人个想法，未來愛用四縣來翻譯个機會還當多，無過愛看著南四縣為本个作品，可能還過難得。
總講一句，客人愛有過大个心胸，夠遠个眼光，盡量容納各腔頭个客話，盡量讓各腔頭共下講客話，正有可能內部先做溝通。
