水果王个秘密
【圖、文／黃美貞／臺北市光復國小教師】
發音人：黃美貞（四縣腔）
今年个暑假當特別，因為亻厓兩公婆共下去馬來西亞，拜訪熟事二十零年个老同學－建楠，想着還吂結婚个時節，第一擺出國，乜係用落地簽證到新加坡，同這個老朋友見面。
食夜該下，佢特別邀請兩個阿姊來打嘴鼓，盡重要个係愛帶亻厓兜去食水果王，這係佢自去機場接機就計畫个行程。正開始，亻厓同老公就想兜理由，想閃開無愛去食，想愛分建楠了解亻厓兜个想法，因爭榴槤有一種羴味當重，熱帶水果恁多，食別樣乜做得，偏偏就愛擇榴槤。大姊緊講緊笑：「榴槤係亻厓從細就最好食个水果，尤其係做細人个時節，阿爸帶榴槤轉屋下，兄弟姊妹仔定著坐正正，大家圍等看阿爸用刀仔將榴槤破開析，拿出金黃个果肉，分大家食，正經有罅暢，該毋單淨係食水果，心肝肚還有淰淰个幸福。」一直到今，佢還係會同子女共下去榴槤攤仔打鬥敘，原來榴槤个愛係一代傳一代。
榴槤店到了，佢兜擇好兩粒，講好做得現破現食，係破開來無中意，做得包退包換，攤仔擺等幾下組桌凳，同幾下座像山仔錐錐个榴槤，還有三四粒一串个，怕有十過零串，纜纜吊吊當打眼。榴槤破開析過後，亻厓兜帶等手落仔共下喊開動，頭下碼係驚驚仔，細細口仔咬一息息仔，發現味道同頭擺食个無共樣，講實在話，味緒異好哦！建楠講：「榴槤盡補，做正餐食乜做得。」斷真有影，亻厓正食兩片，就試着面頰卵慢慢仔變燒，像食炒雞酒樣仔，遽遽食兜仔果后山竹來退火。
𥍉一下目，大家都從二十零歲个大學生變成五十歲个中年人了，一開嘴，手機仔一滑，淰淰个回憶就轉來了。這擺旅行印象盡深个係榴槤，佢毋單止係水果个王，乜分亻厓體會到大家痛惜榴槤个心意，感謝老同學恁相惜，就像果王醹醹个滋味，永久就毋會添放忒！
