《客英大辭典》係1905年在廣東河婆編纂出版个，裡肚有已多老古言語在臺灣較少聽着，毋過真有道理。下背就選幾句仔來分大家試下仔鹹淡啊了。
一、有假子，無假孫 adoption shows in the son not in the grandson. 原在人係無降抑係無倈仔，就會揇一個倈仔來傳香火。毋過毋係自家身下出个，有个人對揇个倈仔毋係已惜，有个還會苦毒。等到揇个倈仔降有倈仔，香火定著有後代好傳了，做阿公阿婆个就會惜孫仔惜到命樣仔。有一句客話講：惜花連盆，惜子連孫。這位个子係親生子，毋係假子，實在爭差已多。
二、紅金鯉留來嚇獺 keeping gold fish to frighten otters.（met. Useless）水獺在中國大陸同臺灣本旦已多，專門在河壩肚捉魚仔食。紅金鯉厥色目恁紅，有人想同佢留下來看嚇得走水獺無，吂知加水加豆腐，全無效，還係分水獺呷忒。講人做事情無去考慮着結果，就做得用這句話。毋過這下無論係在大陸抑臺灣，因為環境生態个改變，水獺強強就會絕種了，怕無幾多儕識看過。
三、空手女，無空手心臼 a girl may visit her mother empty handed, she must bear gifts on return to her mother-in-law. 妹仔人轉外家做得空手去看阿姆，毋過轉去定著愛帶等路分家娘。嫁出去个妹仔，日仔可能過來毋係已鬆容，轉外家會空手liaˇ xiaˊ，做爺哀个會思量佢，等妹仔愛轉去，定著會拿兜東西分佢帶轉去分家娘做等路。做爺哀儕知得愛兜人个飯碗無恁該，𢯭得著个就𢯭。這下个妹仔人轉外家大體會帶等路，還會車仔駛等去，等愛轉該下，車仔个後斗塞淰淰爺哀種个菜過果子，正經係妹仔賊。
四、過坑腳愛濕 you cannot cross the river without wetting your feet. 識過過河壩个人就知，過深个水，褲腳愛攝起來，過淺个水有石跳仔，毋過跳來毋堵好，會跌落水竇肚，腳定著會濕忒。故所正會有這句老古言語，同現下人講个“驚熱就毋好入灶下”个意思共樣。有个人好做官，等做到大官了，總會有做來毋好，分人兜腳个事情，輒常分民意代表抑記者問到嘴擘擘仔，就會譴膣膣仔，下擺仔還會拍桌拍凳，正經係賊仔惡過王，明知過坑腳愛濕，無人監佢，還強強愛過。
五、好人恅做賊，火炭恅做墨 a good man he takes for a thief, a piece of charcoal he takes for a stick of ink.（man does not know man）. “恅做”在臺灣个四縣係”恅着”，同好人看做係賊仔，同火炭看做係墨，這種人毋識貨，早慢會誤事。這下臺灣个政治人物，已像真多這種好壞分毋出个頭人，正會愛食卵無卵好買，學校推行麼个雙語教育推到屙膿合滑血。這兜頭人大體毋係好用自家人就係專門奉承佢个人，恁樣行事，百姓仰毋會食屙糟齋？
