猴仔送个等路
【圖、文／黃美貞／臺北市光復國小教師】
這是我們從小生活長大的三合院，一家人和樂融融，
父母勤儉持家給我們最好的身教。
發音人：黃美貞（四縣腔）
前一駁仔，亻厓同屋下人共下去花蓮太魯閣遶尞，看著一群猴仔對山壁飆下來，像伯公生鬚過馬路，柔柔仔就對人多个地方去討食，亻厓看著這个情景，心肝頭還係會打激顫，馬上想起做細人仔該下，分猴仔爪著个回憶。
該年亻厓五歲半，為著愛分亻厓先扌帣眾，先熟絡學校个生活，阿姆送亻厓去聖帝廟脣个幼稚園讀書。屋下離學校當遠，逐日愛打早䟘床，緊拚拚仔食忒朝，遽遽愛跈等小學五年生个阿哥，共下行路去學校。這段路無算短，至少愛行半點鐘較加，旦勢係亻厓望等阿哥个背影仔，行幾步仔又走一下仔，盡量跈得著阿哥个屎背尾。因為下學期正入學，無麼个熟事个同學，屋下又旦旦講客較多，上課該下，正經係鴨仔聽雷，麼个就毋會，淨知食忒點心就愛放轉了！
總算耐到畢業典禮該日，看著同學上臺領獎、表演，大包細包个獎品擐等轉，亻厓半息獎品就無領著，連一張獎狀都無，心情當慍悴，轉屋下个路項，亻厓緊行緊踢石頭，堵好看著一群細人仔，對綯在路脣相絲樹个猴仔緊擲石粒仔、磚截仔，猴仔僅可目盯盯仔囓牙𫠛齒，乜無奈何。
亻厓企到遠遠看等佢兜，突然間，有一儕人揬亻厓講：「你定著毋敢行較兼兜仔，拿石頭擲猴仔呵！」亻厓毋擔輸贏應佢：「有麼个好驚？」跈等在地泥下拈起一粒石頭，行到猴仔个面前，就對厥圓身擲啊去，無想著，猴仔嗄跳啊過來，對吾手想爪兩下，亻厓自家嚇到坐在地泥，歸手仔就係血，還走毋得掣，其他个人就湢瀉了，等著心神較定疊一息了，正開聲噭等轉屋。
四十年過去了，該兩隻痕還真真，時時提醒亻厓自家，好得猴仔大人手下留情，單淨爪著手想定定，下後个人生路，做事情愛細思量，學會尊重每一個生命。
【註釋】
伯公生鬚：音bagˋ gungˊ sangˊ xiˊ；形容不慌不忙、從容不迫，老到的樣子。
柔柔仔：音iuˇ iuˇ eˋ；從容不迫，不疾不徐的樣子。𢯭眾：音tenˇ zung；合群，與大家一同。
緊拚拚仔：音ginˋ biang biang eˋ；需要趕工而時間很急迫的樣子。
旦勢：音danˋ sii；多半、多數。
屎背尾：音sii boi miˊ；背後。
旦旦：音danˋ danˋ；幾乎、大多是。
鴨仔聽雷：音abˋ eˋ tangˊ luiˇ；像鴨子聽見雷聲一般，聽不出所以然。比喻一個人對所接收的訊息無法理解。
放轉：音biong zonˋ；放學。
慍悴：音vudˋ zudˋ；鬱悶。
囓牙𫠛齒：音ngad ngaˇ sen ciiˋ；咬牙切齒，忿怒狀。
