0211成果發表
【圖、文／江卓安／國立中央大學客家語文碩士班】
今晡日係一場真盛大个演講，該演講个主題係麼个呢？嘿嘿，演講个主題係「亻厓所知个印尼客家」，其實就係對這幾日个田野調查做吔一隻初步个小結論，所以大家揣着吂，這場演講个主講者，就係中央大學个同學。
一開始就係對會館組个同學開始做報告，其實因為亻厓對社會研究方面个論文較毋知愛仰般來做提問，故所亻厓對會館組个青年認同、還過客家話補習班个傳承等等个相關研究，都單淨聽同學報告，毋過做得知个係，對這門課个一開始針對印尼華人个研究文獻來看，其實做得看著，蘇哈托个出現其實影響盡大，因為佢要求个保留印尼文化等等个政策，分華人在印尼有吔一隻盡辛苦个地位，「排華」个影響乜分華人个文化、語言等等个傳承都有盡大个影響。
亻厓還發現着除了會館組講个「青年困境」以外，其實在生活裡背，泗水个客家人還係用「血緣」做客家認同，毋過知自家係客家人，乜會講客家話，但係佢兜交談个時節還係用印尼話來做交談，這係一隻盡大个問題，毋過亻厓兜中央大學个同學問該兜會館个阿哥阿姊个時節，佢兜還係會用客家話來應答，實在當生趣。
續下來係飲食組，其實飲食組个報告還係做一隻初步个飲食比較，對亻厓來講，都係亞洲文化圈个，故所對「米飯」个需要定著係共同个。毋過在餐具、調味料方面就有無共樣个發展，這就係亻厓兜發現个比較。印尼个傳統料理較多香料，還有印尼个飲食多用炸个，華人个料理較多有豬肉，因為印尼个宗教較多係伊斯蘭教，所以無豬肉，這就係初步个發現。還過亻厓自家針對外來語个語序乜寫了一隻小文章來同大家講亻厓个發現，就係「直接翻譯」還過「語序倒轉」這兩隻係亻厓發現在印尼語世界針對外來語所出現个語言對應關係，乜在臺項用少少个時間做了文章發表，用上課个方式來同大家講，乜達成了「動感發表」个成就ＸＤ。
最尾是宗教組，佢兜毋單淨對廟宇進行研究，因為佢兜還有先生跈等來打幫，故所佢兜有盡多个資料做得講，亻厓試著宗教組可能因為資料過多，赴毋掣來整理，故所正做一隻細細个、初步个紹介，假使大題大作，這乜做得做一隻盡豐沛个研究，分亻厓兜對於泗水个宗教有過較多个了解。
這係在印尼最尾个一隻活動哩，係講盡毋盼得，毋過亻厓對泗水个感情就像秀珍先生同大家講个「愛有遺憾，下擺正會過來一輪。」，亻厓个遺憾可能就係無法度摎印尼个餐廳料理名稱過好好來訪查，分自家个研究理論基石過穩定一息，下擺希望去泗水係直接飛，轉機正經還痛苦哦～
