中大客家學院電子報第四二八期

楊梅泉水窩江夏堂建築个藝術風華（三）

【圖、文／徐貴榮／國立中央大學客家語文暨社會科學學系兼任助理教授】

發音人：徐貴榮（四縣腔）

櫃臺腳、屋面前天時坪鋪个石頭，全部都係大陸運過來个「壓艙石」，安到「閘（ngad）艙石」。（圖14）歸棟屋包含正身同橫屋，全部都係用日本時代，當時台北「台灣株式會社」在基隆河壩脣起窯生產最好个「TR磚」，紅磚仔結个。這TR磚一出窯賣个時節，一垤磚仔包一張糯米紙，非常貴，用牛車轉運，從臺北運來。圍牆，也就係「文筆牆」，牆腳係用花崗石做底，磚仔係用油面、顏只、中興三種磚仔合紅泥結起來个。橫屋門框个磚仔，有烏个、紅个雜等，係較硬个火頭磚，安到「煙燻磚」，係楊梅在地做个。因為該兩時楊梅有當多磚窯，本地个泥係紅个，這紅泥係燒磚瓦當好个材料。結「煙燻磚」愛有一息仔技巧，正會有烏个斜紋，到這下來這兜磚仔全部嗄變到特色。

橫屋外牆有鳥踏，牆腳採用鵝卵石結造，毋單止有在地性，分人看着紅磚、花崗石板剛硬个建築，增添柔和个美感。棟頭採用「金、火」兩式，係起屋主人盛祥公從這間屋个五行來看，後背个化胎、屋脣个風圍都當闊，種當多樹仔，毋缺「木」；四管水透落六分地个半月池大陂塘，講係「細水長流、四方納財」，毋缺「水」；起屋之時，田地就有百過甲吔，毋缺「土」。故所，為着屋場環境所缺个需要，就在棟頭做「金、火」兩式來補足五行。（圖15）

屋肚个擺設，主要係在正身廳下，中央係阿公婆神牌、香爐、神桌、拜桌。神龕底下有「龍神」神位，脣項正係神明神龕，表現客家人「祖在屋，神在廟」个信仰思維。這神桌、拜桌，全係在百過年前從大溪運過來，用臺灣最好个hi no ki做个。龍片服祀个神明，除忒觀音娘、媽祖娘以外，還有兩支義民旗、楊公仙師同其他神；虎片掛等十九世祖盛祥公个畫像。

屋肚个裝置藝術有刺繡、字畫、玻璃彩畫、彩繪、木雕、磚刻這兜。刺繡、字畫主要在阿公婆牌兩片、頂高，掛等五幅个花鳥、字畫這兜「原汁原味」个藝術作品，非常个工夫、幼秀。這兜係起屋主人盛祥公个「大孫嫂」自家刺來做嫁妝帶過來个，係清朝陳秀才个孫女，寫字个人就係厥公陳秀才。還有一幅對聯刺等「貴自勤中得，富從儉中來」，落款「李遠樵書」，李遠樵係當時臺灣三大收藏家李錫金个孫仔。這對仔掛到祖公牌脣，用來時時勉勵子孫。（圖16）

本屋个樹材全係大陸運來个福州杉，做棟梁、桁桷、簷樑這兜。大門入來頂高有一枝樑，安到「狀元樑」，吊等廳燈，係有擐大肚个婦人家落來，會摎煞氣擋忒，毋會一下就看着棟梁頂高个八卦。木雕有神桌个圓形「軟團」（圖17），拜桌方正个「硬團」（圖18），還過棟梁兩片个「雀替」。

兩片壁項掛等玻璃彩畫藝術，虎片有一面鏡仔（圖19、20）。這位本旦係放一隻大時鐘，後來壞忒正放鏡仔。做麼个會放時鐘仔抑係鏡仔呢？聽主人講：「頭擺祖公有做過貢生，政府長透會派人來，『鐘』就係『忠』。換擺『鏡仔』，用華語講『鏡鐘』就係『盡忠』，分落來个人，看這面鏡仔，就會認定這家人有『盡忠』！」在這玻璃彩畫下背壁項，貼磚四角有磚刻「蝠婆仔」，華語講「蝙蝠」，表示「四季賜福」，連落屋个貴賓，就係「五福臨門」吔！（圖21）

祖公起屋之時就希望屋仔清淨高雅、子孫道德高超、文武雙全，故所在「子孫廊」（內通廊巷路）左右門項各寫「左宜」、「右有」，係取詩經小雅篇「左之左之，君子宜之；右之右之，君子有之」个詩句仔，希望屋下人、子孫个品格、道德都愛比人多加雙倍。子孫廊門楣頂高，龍片有「卷軸」、書涵、兩枝筆，還有靈芝、蓮花；（圖22）虎片係「摺頁」，有靈芝、仙掃仔（拂塵）、寶劍、揚蝶仔。（圖23）

卷軸、摺頁表示「開卷有益」、「科考得名」；寶劍練武，強身保國，這就係「文武雙全」。靈芝生到清幽靜雅个山項，蓮花生到屙糟个所在毋會受着污染，故所「靈芝、蓮花」个含意就係幽靜、清淨同高潔。「仙掃仔」係仙人个法器寶物，抑係有壅塵就愛用佢撥淨來。「揚蝶仔」華語講「蝴蝶」，「蝴蝶」个「蝴」華語同「福」共音，意思係「福到眼前」。大門內个頂背寫等「福星拱照」，表示子孫同人客出門都有福星照護，這係每一個客家伙房屋都有个彩繪文字。（圖24）

（本文吂完，下隻月10月初一請待續）

返回上頁

中央大學電子報

楊梅泉水窩江夏堂建築个藝術風華（三）

【圖、文／徐貴榮／國立中央大學客家語文暨社會科學學系兼任助理教授】