七月棗八月梨 九月柿仔紅了皮
【圖／廖千慧；文／何石松】
發音人：何石松（海陸腔）
七月棗，八月梨， 九月柿仔紅了皮，表現出了歸隻秋天，各地介紅棗，水梨，柿仔等水果從生長到熟咧，可以收秋介過程。分人感受著滿山介果子，垂椏垂桍，紅訂訂，青荷荷，秋果滿山紅介景象，毋單風景靚，營養好，也係最好介養生水果，能夠食著舊曆七月紅棗，八月水梨，九月介柿仔，係最能順應天時，使著人摎大自然和諧，還過身體內部和諧健康介境界。
因為棗仔等這三種果子，可以食補，更可藥補。大家都安腦佢為「紅寶石」介紅棗，諺語斯講：「若愛身體好，逐日食紅棗；一日食三棗，一生毋會老。」又講：「五穀加紅棗，贏過靈芝草；若愛皮膚好，日日食紅棗。」可見紅棗，係已好介水果，也係一種靈丹妙藥。難怪李時珍《本草綱目》斯講：「（棗）補中益氣，堅志強力，久服不飢。潤心肺，止嗽，補五臟，治虛損，和百藥，久服輕身延年。」恁堵好，這可以益壽延年介紅棗，在台灣，能夠出產在苗栗公館介客家庄，也係獨一無二，難能可貴，公館介紅棗，越來越有名，越好食，大家多多來去食紅棗，分亻厓俚介身體健康，越來越好。
七八月介水果儘多，仰般斯講七月棗，八月梨摎九月柿仔定定？該係因為七月開始係秋天，秋天介五行係金，五臟為肺，於時為陰，於卦為否，天地否，係當毋好介卦，陰氣當深，有肅殺蕭條，凋謝萎忒之氣，氣虛斯人虛，就有傷心悲秋之情，可能會傷著肺，這下就愛注意著肺介保養，堵好這棗仔梨仔就可以滋潤心肺，又可止嗽，可以益壽延年，身體健康，長命百歲。也係民族興旺傳代介水果，吾俚常常希望新人多食紅棗，能夠早生貴子，係養生文學性介語言。七月棗，毋單係水果定定，更係止嗽健康介補品，這係順應節氣運行，最好介果子。
七月棗，八月梨，其實係講七八月介紅棗摎水梨，愛開始多食。梨仔，係從舊曆四月就開始出咧，以後長年透天都有梨仔好食。該仰般毋講四月梨，愛講八月梨呢？這斯摎七月棗共樣，合著季節變化，全部可以消痰降火，止嗽醫病，潤肺涼心，係最好介自然良方。四月，係陽氣最盛時節，五月一陰生，到七八月，內部陰氣就盛到強強愛摎陽氣打橫，八月梨，斯發揮了佢介功能，意思係，在七八月介秋天，一定愛食水梨，使身體健康。
水梨，最早係從大陸引進，種在新竹橫山，所以，早期水梨係橫山等有名。後來，苗栗，台中，彰化，嘉義等各地都有種，嗄變做梨山水梨最出名，到這下，各地介水梨都當好食咧。聽講頭擺唐武宗頭風痛，麼介藥仔都食毋好，有人分佢食水梨汁，嗄醫好咧。在《類編》這本書裏肚也講：有一個人，殗殗無精神，去看楊老先生，先生講，你氣血消散昶多，這去三年，可能會無命。該隻人無幾歡喜轉去，打探著茅山道士，醫術通神，又當謙虛毋會沙鼻，佢就去拜訪，甘願做徒弟，道士就收留佢。一段時間以後，斯摎先生講來拜師介原意。茅山聽了以後，就喊佢遽遽轉去，逐日愛食一隻水梨，係講生梨食忒，就拿曬乾介來泡湯，食渣啉汁，病自然就會好。佢照先生吩咐，食了一年介水梨，病，正經好咧。無想著，水梨，原來係「救命梨」啊！
除了「救命梨」以外，乜還有「救命柿」。柿仔有三種食法：所謂「九月柿仔紅了皮」，係講樹頂介柿仔，毋去摘佢，慢慢自然就會紅。摎黃柿仔摘下來，在屋下也可以翕紅柿仔，軟臍軟臍儘好食，這係第一種食法。第二種就係浸水柿，乜已好食。第三種係曬柿餅。新埔北埔介柿餅，在九月介九降風吹來，所曬介柿餅特別好食。除了好食以外，摎棗仔梨仔共樣，還可以消痰止渴，滋潤心肺，溫補止嗽，難怪有人講：「一隻柿仔當得十帖藥」，九月柿仔毋單紅了皮定定啊。
聽講永樂皇帝還係太子時節，帶兵相㓾，在黃河口㓾了一日一夜，包尾，斯伸著百零儕逃出來，悿到硬硬堵毋著，一個一個從馬背囊頂跢下來。當時堵堵好係九月，樹頂介紅柿仔，一隻一隻跌到滿天下，佢兜斯拈來食，無想著，越食越有精神。後來，北京登了基，當懷念九月介紅柿仔。無想著，九月柿仔紅了皮，還救了皇帝一命，紅到北京去！
看來，七月棗八月梨，九月柿仔紅了皮，係秋天最靚介風景，更係健康和諧介指針；係藥補，也係食補。記得，「若愛身體好，日日食紅棗」，「若愛日日係良時，愛食紅柿摎水梨。」救命柿，救命梨，正經係吾俚介生命知己啊！
※本文的「介」為大眾通用的「的」，同教育部訂的「个」之意。
