吾客話強強會變種
【文／羅肇錦／國立中央大學客家語文暨社會科學學系榮譽教授】
發音人：羅肇錦（四縣腔）
崖1949出世在苗栗銅鑼三座屋。
吾爸吾姆除忒客話，其他个海陸話、山地話（道卡斯）、學老話、日本話、國語，全部毋會講、毋會聽、也毋會寫字。
當時隔壁鄰舍輒常會笑吾爺哀恁濫斗，恁無世面，恁無字墨。
該央時崖知吾爸吾姆，愛賺三餐米飯餵飽一群大細就無日無夜，罕得離開田丘埔園圳溝，最多就上街賣草結買魚肉鹹淡，差毋多歸生人就囥在山項。哪有麼个有世面無世面，哪有麼个有字墨無字墨。
就恁樣，吾客話同吾爺哀、同吾兄弟姊妹、同吾鄉鎮鄰舍、同吾親戚朋友學習交談，慢慢講出崖到今就還會講个鎮平（蕉嶺）客話。
毋過，七歲入學讀書了後，吾客話緊來緊多國語詞彙，尤其讀師範學校要求愛講北平腔个正版國語，正有資格出去教書。
前世無修正得，毋多知欸，吾客話發音也緊來緊像國語，詞彙也緊來緊多國語用詞，像上課、學校、認真、專心、雖然、但係、幫忙、重要、共同、擔任…。差毋多十隻詞肚項有四隻係國語借來个。
到今晡日，崖七十零歲欸。算係推廣客家話老一輩个人，倒轉來聽現下後生个客家話，正經係前世無修不肖子孫。難怪會鬧出恁多客語笑話：
1. 老人家尋老同年尞，堵堵無在，同年个孫仔講「阿公扛扛（剛剛）出去了」，嚇到佢道嘆生命無常阿彌陀佛？
2. 細阿妹仔去同伯婆買小番茄，細阿妹仔問：「阿伯婆若番茄係搵屎（溫室）个無﹖」，阿婆講：「細阿妹仔還高毛喔，崖尿都毋盼得淋，樣會搵屎？」
3. 後生人拿起杯仔講：「乾杯」，老人家講：「麼个跳蚤乾蠯？」
4. 早晨頭，老人家聽後生人同佢問安：「早（燥）！」老人家想「這隻毋成猴个，仰七早八早愛同崖飲酒？」
頂項三截笑話，都係老一輩个客話，分後生人豁淨淨，全全用國語音國語詞來想，結果搣到鬍鬚麻嘎想死就毋得斷氣。
還有，還我母語運動以來，罵人「硬頸」死不知變，嗄分大家拿來阿腦客人恁有骨氣。
一直罵人做事潦潦草草，畫圖亂塗亂畫，著衫毋會配色亂著亂串，就安到「嘩啦嗶波」，結果一下嗄變到「嘩啦嗶波還靚哪？」
這兜客話个變化強強變到種草都變忒了，實在係當痛心个賣祖宗言現象。崖當早就愁這恁樣个語言推廣，恁樣个客話教學，仰會對得起祖先。
還較前世無修个係，當多客家文化研究者，講客家係相同理念个一群人所建構出來个，根本無去看早期文獻比對歷史，也無瞭解中國族群相互影響个關係，就恁樣用現代个社會調查，就想愛來解釋客家，實在係萬世無修。
像「客家」个「客」（音ha）本來係山仔个意思，「甕菜」个「甕」（音wung）本來係「水」个意思，「客和活貉」（音ha）「甕翁滃蓊」（音wung）全部係客家祖地苗瑤畲客所歇个所在，ha這个音一直就係山仔个意思，wung這个音一直就係水个意思。故所客人係山項个人，甕菜係水菜，客家就係苗瑤畲客演化出來的民族。
這兜答案愛保留原種客話正有辦法解釋，係講客話變種到崖面前講个現象，該前世無修个客人歷史社會，就全無痕跡去解釋了。
※本文的「崖」同教育部訂的「亻厓」之意。
