客語「毋過」个多種語境
【文／鍾榮富／南臺科技大學應用英語系講座教授】
發音人：鍾榮富（南四縣腔）
用客語翻譯英文个經典，可能堵着个問題同用客語書寫小說、散文、劇曲、報導文學个共同困難，其中最明顯个就係客語表示「對照、不同」个連接詞（轉折詞）「毋過」相當缺少，盡難尋著相等或者相同个語詞。
連接詞同虛詞、功能詞共樣，在用詞或者構詞肚，屬於「關閉型」（closed words）構詞，係講這種詞既經關門了，當少機會增加，毋像開放詞（動詞、形容詞、副詞）還有當大个增加空間，只要時代改變，新个產品出現，像「手機、跳舞機」等都係新時代需求下，定著會增加个詞彙。反過來講，客語个連接詞除了外借以外，本身愛創新詞个機會毋係盡大。
後背，先來看客語同華語前後相反个轉折詞个比較，正來說明未來應該行个方向。
對客語語法个角度來講，「毋過」屬於前後語句帶有相反、對比个轉折連接詞，用法像華語个「不過，然而，但是，可是」，如:
(1) 他吃了一大半食物，不過（然而，但是，可是）我也用力鞭打了他。
(2) 雖然他沒說什麼，不過（然而，但是，可是）表情卻顯得不耐煩。
(3) 他平常喜歡吃點甜的，不過（然而，但是，可是）現在她卻只想吃鹹味。
客語个問題在頭前（1-3）的語境肚，都定著愛用「毋過」。客語乜無華語个「卻」，故所在英文翻譯中，客語个「毋過」使用頻率相當高。後背幾句做得參考。
(4) 看毋清楚該隻狗仔，毋過佢同其他个狗仔共樣。
(5) 雖然還看毋著日頭，毋過南方地平線早都有兜燒暖。
(6) 「該隻狗仔食忒一半，」佢講，「毋過，亻厓乜𢫦吔佢一大棍。」
換句話講，客語表前後相反、對比个轉接詞毋罅多，故所單一个「毋過」愛用來表達多種不同个情境。唯一个補救辦法，可能係愛將華語个「但係」帶入客語書寫裡肚，無就會讓文章書寫變到重複使用个詞忒多，讀起來單調、失情，缺少文字聲韻个變化，乜會失去用字个彈性。「但係」个客語發音無問題（意思係講，照華語个讀音經過客語變化，改讀[tan he、dan he]都無會影響溝通个順暢性）。其實，在一般人个口語溝通中，像「佢平常愛食甜个，但係這滿佢想愛食鹹个味緒。」恁樣个客語，既經有當多人在口語交流中自然使用，並無會影響雙方个對話。
除忒「但係」以外，其他華語个轉折連接詞，像「然而，可是、卻」用客語來念都毋係盡符合客語个語音結構，故所比較過難借入客語書寫。當然，未來係準客語書寫越來越流行，這兜語詞乜可能漸漸仔進入客語書寫裡肚。
