亻厓想愛去个印尼城市 不留遺憾
【圖、文／江卓安／中央大學客家語文碩士班】
係講愛選擇一隻除忒臺灣，你最好个國家，亻厓前幾年會應答係維也納，因為該係音樂个故鄉、音樂个城市，過前幾下個月可能會應答日本，因為該位有當多好食好尞、還過當多有名个歷史景點，現下你問亻厓，除忒臺灣以外你最好个國家，亻厓會回答大家一隻答案，安到「印尼泗水」。
在泗水戴吔兩隻禮拜，其實學个東西盡多，毋單淨係在出國前簽證頂寫个「學習當地文化」恁簡單，就像頭前講个買東西毋知仰般回答，到中期會用「客式英文」回答，最尾會用一點仔印尼文還過透一點英文講出來，連自家都感覺：亻厓仰會恁慶啊！
泗水其實係印尼个第二大个城市，以前个飛機班表其實有臺北直接飛到泗水个班機，毋過因為疫情關係，係，無毋著，又双叒叕係因為疫情，疫情實在影響了世界盡多，乜感謝疫情，分亻厓兜這擺來印尼个參訪做得先去雅加達看一下印尼客家總會个大家，乜在雅加達个麗園餐廳食吔豐沛个餐點，乜做得去雅加達个縮影公園看客家博物館，亻厓試著這係疫情帶分大家个一隻意外，無去客家博物館，其實大家都毋知外國个客家係麼个，有去吔客家博物館，大家就知國外个客家其實實力已強。
到現在亻厓都還係試著來印尼兩隻禮拜正經毋罅，可能愛留幾日在成果報告忒个幾日，分大家在印尼好好仔放輕鬆，體驗當地生活，毋過因為開學个關係，就做毋得在泗水多加留幾日哩。可能就係像秀珍先生講个共樣，愛留一點遺憾在泗水，恁樣就會正過去泗水。其實亻厓自家乜試著正經有留一息遺憾在泗水，該就係自家還吂就東爪哇个逐个城市都行過、看過，就像該日去瑪琅、峇都，亻厓還想去看其他東爪哇个城市个風景，乜做得摎印尼所有个客屬總會都拜訪過一遍，假使係恁樣安排，可能愛去印尼盡多擺。
其實毋單淨係印尼爪哇島，亻厓還有一个在印尼盡想愛去个城市，就係山口洋，因為該位客家人个成分十分高，你毋會講印尼話無要緊，講客家話乜做得通个夢想，做得在山口洋實現，還過山口洋个市長還像乜係客家人，故所山口洋正經係一隻盡客家个客人城市。
最尾還係愛感嘆一下，在泗水个時間無罅多呢，定著愛把扼時間，多做兜事情，分留在泗水个遺憾加少一滴仔。
