棗到公館 冰涼一夏
【圖／蔣佩儒；文／PEII】
（圖一：等待成熟的紅棗）
熱天熱熱，紅棗當甜！你有看過紅棗鮮鮮个樣仔無？
原來在苗栗公館，其實有最萋个紅棗，單淨一個月，你做得有這兜美食好食，今年（2023年）苗栗公館紅棗節就會在七月二十二日揭開序幕啦！遽遽把握時間來去看看啊，現下在公館乜有浪漫台三線藝術季𝙁𝙖𝙡𝙖𝙗𝙞𝙙𝙗𝙤𝙜 花啦嗶啵摎後龍水互動个藝術品！乜做得去附近个出磺坑遊尞，看焗腦个過程去思考傳統產業在現代个改變，把握這個暑假來公館搞一下，在大暑前後到八月尾都係這兜紅寶石个產季，今年公館鄉農會還推出「紅棗細路」活動，有好聽个歌手表演、紅棗市集、細旅行，你自家駛車也做得集章或fb打卡換枝仔冰來食，冰涼一夏，還有「棗飯兜」在預購中，當多當多活動啦！歡迎到這位買紅棗、食紅棗，還有當多有特色个紅棗產品做得買，看藝術季摎地方个互動，共下踏上悠閒个腳步來一場田園旅行哦！
（圖二：苗栗公館鄉農會今年推出个細旅行）
還過苗栗公館係全臺灣唯一个紅棗種植產地，從2015年就專門成立紅棗農業經營專區，逐年都會有農藥檢測，分消費者做得食安心、食康健、食在地，還都會選出紅棗王，分農民有自信做到越來越好，現下就係紅棗最萋个季節，今年大豐收，鮮鮮帶等紅，越紅越甜，毋過就無恁清脆，故所在你採果个時節選帶點紅斑還有青青个就會最好食，在採果个時節乜愛注意手，因為紅棗樹其實係有細細个竻，就像玫瑰，毋過毋使忒過操心，逐年農場主人都會同佢剪忒啦！故所，冰在冰箱底肚後拿出來食，像細形个棗仔，當好食！冰冰又甜甜，你會一粒接一粒食忒。若係食毋忒，還做得放到日頭下分佢燥，就會有最天然个紅棗乾好煮，紅棗冰、紅棗果醬、紅棗酒、紅棗雞湯、紅棗炒飯……，口涎水都愛流出來哩！好食又營養。
