三歲打爺，爺歡喜；三十打爺，爺譴死
【文／彭欽清／國立政治大學退休教授】
發音人：彭欽清（四縣腔）
古今中外，當多文學作品，尤其係戲劇，都係用爺哀同子女打逆面來做探討个主題。看得出爺哀同子女之間个齬齖係自古以來世界性个問題。
上一輩人較苦，子女又多，逐日顧三餐就無閒到會死，無幾多時間好來勾惹細人仔，大體就係天生天養，毋過大部分个細人仔已受教，守規矩。這下个爺哀大體降一兩個仔定定，生活又較鬆容，同細人仔服恃到像阿公樣仔，毋過細人仔輒常同爺哀毋和，動啊著就同爺哀擎硬篙仔，講無幾多句話就冤家泌背，世大人就會喁講：「吵衰家，兩個都教毋好，像原在人降恁多愛仰結煞？」
到底這下个細人仔做麼个較難教？愛仰仔解決？這兜問題有當多教育、社會、心理學个專家學者研究。亻厓在這提供多少仔个客家爺哀渡子女个經驗，罔分這下个做爺哀儕參考。
大體个爺哀就會試著爺哀難做，還細時節，每擺聽吾姆同隔壁鄰舍講渡細人仔个經驗，總會聽著恁樣个結論：細細仔撚毋得大，大吔又煩勞一千擔。在爺哀个心肝肚子女永久係細人仔，每一階段就會有無共樣个煩勞，故所正會講：等水難滾，等子難大。
細人仔還毋知人我个時節盡得人惜，下把仔毋知重輕，擎起拳頭嫲就搥阿爸，毋會痛毋會癢，做阿爸个都會笑笑仔像已享受樣仔，脣項个人明知做阿爸个當暢，乜會同細人仔講：「恁大膽啊！阿爸都敢打，會分雷公敲哦！」教細人仔打阿爸係做毋得个。
細人仔到欸六、七歲吔，應該就知打阿爸係毋著个，莫講到變大人欸，故所正會有「三歲打爺，爺歡喜；三十打爺，爺譴死」這句老古言語。係講做子女个到欸三十歲吔還打阿爸，就表示家教失敗，做阿爸个仰毋會毋譴死？
一個三十歲个人還會打阿爸，亻厓想有兩個原因，一係管教忒嚴，子女佇毋著，二係縱忒慣勢吔，嗄管教毋聽。故所愛仰仔管教到堵堵好？係每一個做爺哀个想著頭那都會打箭格个難題。
做爺哀个總係望子女成龍成鳳，若係子女無才情，無法度成龍成鳳，最起碼乜愛曉得賢孝。無論愛子女行哪條路，定著愛從細仔教佢這兜仰仔行，客話講；養子毋教育，耕田毋割榖，就係愛做爺哀个重視子女个教養問題。
原在人大體歇在大家庭，定著愛靠家規，歸個家庭正做得運作順利，自然就會有「寵兒出逆子，嚴父出孝郎」抑「棍打出孝子，嬌養忤逆兒」个觀念。
毋過，忒嚴條个教養方式，定著會有反效果，做爺哀个體悟著忒嚴條毋係辦法，正會想出「教細人仔愛三擒三放」个方式，該硬愛硬該軟愛軟，細人仔正會服。這種教養方式當符合現代个輔導原則。
有个爺哀平常無麼个管酌細人仔，等到細人仔做壞事情吔，正管到愛嚴又愛嚴，想一下就同細人仔教正來，吂知越管越壞。世大人看著就會勸話講：「教細人仔愛定定仔，像拗竹仔樣仔，毋好一下拗忒彎」，這種用生活經驗來講愛仰仔教細人仔較好个方式，比麼个深又玄个教育理論都較有效。
另外，老人家會講「降子身，無降子心」，就係講爺哀降个係子女个身體定定，做毋得去控制子女个思想同看法。故所，做爺哀个毋好定著愛子女總下照等自家个意思去做。子女有佢自家个想法，做爺哀个應該愛尊重佢這兜个想法。這種開明的教育觀念，乜值得分現代做爺哀个參考。
現下个社會，逐儕人都當無閒，歸個社會都當亂，做得講係：天年倒貶，朳仔打牛眼。三不二時有子女㓾爺哀，無就爺哀㓾子女个新聞，仰仔來建立一個和挼美滿个家庭係當多現代人想愛達著个目標，故所有關仰仔教養子女過親子教育个的書都當有銷頭。
專家學者寫出來个東西，當然有參考个價值；毋過，𫣆个祖先靠經驗累積出來个智慧可能還較實際。係講做得多聽世大人講仰仔教養子女，後輩仔个爺哀定著做得多享受「三歲打爺，爺歡喜」个天倫樂，毋會有「三十打爺，爺譴死」恁慘个人生。
