神奇个畢業照
【圖、文／黃美貞／臺北市光復國小教師】
發音人：黃美貞（四縣腔）
國中同學在群組傳來一張幼稚園个照片，直接點名有三個國中同學乜識共下讀幼稚園，黏時群組就鬧熱起來，大家煞力牯尋出自家企在哪位。
阿慧在苗栗南苗市場个教會服務，因爭愛整教堂，整理書櫃个時節，發現著當多老照片，肚項有一張个年份同自家个年紀相仿，無想著，看真來正發現，原來係自家个照片，又想著有幾下儕係共下大个讀書伴仔，連峨接棟，一儕接一儕，算算仔，一共有八儕認著幼稚園个自家。佢兜在群組打招呼，像走轉去四十年前，講起幼稚園个生趣事。
看著同學相認，實在異好搞，毋過，亻厓毋係該間幼稚園个校友，單淨在脣項𢯭鬧熱，話講轉來，亻厓還係當認真看逐個小朋友个表情，欸！盡角項有一個額結結仔，看起來當多心事个細阿妹仔，「一定係佢，毋會爭差」吾心肚想，遽遽聯絡阿屏，佢笑等講：「若目珠真利，連六歲子就認得出來。」
久無見面个老朋友，在群組面頂就唊無停，打白講：「街項个幼兒園就係無共樣，逐儕看起來就白淨白淨。亻厓讀个係宮廟辦个幼稚園，畢業典禮該日，毋單淨兩手空空轉屋，還分路脣个猴仔爪兩空，手想一直都還有兩隻疤。」從幼兒園到高中个回憶，像放影片樣仔，一頁一頁仔看到真真。
一張畢業照片，同幼稚園到高中个同學全部牽起來，雖然大家既經四散，各行各个路，乜當久無聯絡吔，但係共下學習个情份，會一直放在大家个心肝肚項。
【註釋】
煞力牯：音sadˋ lid guˋ；用盡所有的力量。
連峨接棟：音lienˇ ngoˇ jiabˋ dung；房舍多而相連；亦可比喻事情接二連三。
額結結仔：音ngiagˋ giedˋ giedˋ eˋ；憂愁的樣子。
打白講：音daˋ pag gongˋ坦白說。
手想：音suˋ xiongˋ胳臂。指肩膀以下到手腕的部分。
