0207在印尼討論教學法？！
【圖、文／江卓安／國立中央大學客家語文碩士班】
這段旅程正過忒了一半定，今晡日愛同大家人分享在印尼泗水還過臺灣教學現場个差異，倩美係印尼泗水佩特拉大學中文系个學生，佢講佢對華語个教學當有興趣，故所問了臺灣个教學情形等等个問題，這對亻厓來講乜係一種盡心色个交流，亻厓到現下，單淨國小還過高中兩隻階段个學生無教過，其他都體驗過了，故所亻厓就同倩美打嘴鼓，了解佢个專題題目還過做得仰般來實現，對亻厓來講，教學个方法，就係教學法，這係逐隻先生个大大大要領，學生愛仰般教都係差毋多个，假使教學法無同學生合著，該係教大學生普通國語都教到盡食力。
亻厓乜對倩美講吔一句自家盡喜歡个一句話：「亻厓兜教學法个緊創新、改變，就係同理論過教學現場个差異變細。」毋係單淨理論係理論，現場个情況又係另一件事情，該就愛過調整上課个模式。亻厓還問佢个專題係對於那隻部分个學生進行教學，佢講係幼教，該就係人講「噭眵園」个細朋友，還加在自家有在幼兒園做過「安安阿哥」，故所做得分佢建議，亻厓个建議就係，係講愛對印尼泗水个漢語教學進行研究，該就係研究先生本身，先對先生个背景還過漢語教學做連結，再過就係一隻在幼教世界盡重要个要領就係「身教大過言教」，愛仰般來拉等細朋友个目珠，就係用聲音、動作等等个方法先餳佢兜个注意，故所這方法就係一種「製造連結來接近」个方法。
最尾亻厓乜對倩美講，佢對教學个方法進行研究，愛輒常提醒自家幾件事情，大體就係愛對倩美講，教學方法愛時時刻刻記等在心肝肚，毋好離題，研究教學法个人，盡容易離題个方向就係「教材教法」，一隻係對先生个教學進行研究，方向係愛鎖定愛仰般分學生仔學習，這係教學法研究。係講一隻先生上課个「教材」愛仰般來運用來上課，這係教材教法，這係亻厓个理解，亻厓乜同倩美分享，佢乜講亻厓講个乜著，佢乜試著這會同教材教法相混著，故所這正經愛記好來。其實今晡日同倩美个討論，乜知講自家對教學乜已有興趣，毋過毋知仰般，自家總係對教學生仔無結無煞，但係講著教學个理論，自家盡好去體驗，總講一句話，自家認為个教學，就係講愛分教學理論還過教學現場个情況差異來降低，這係最理想个情形，毋過愛仰般達成這件事情，這正經就係逐隻先生个才調哩！
