楊梅泉水窩江夏堂建築个藝術風華（二）
【圖、文／徐貴榮／國立中央大學客家語文暨社會科學學系兼任助理教授】
發音人：徐貴榮（四縣腔）
廷元公帶等派下五房兄弟發展經營，過身過後分家，逐房分着30甲。滿房盛祥公天資聰明，性體耿直，做人忠厚，治家嚴條，到佢九十歲過身該兩時，就有水田、圃園、陂塘、山林、建地這兜財產，鬥鬥起來總下有一百八十零甲。故所盛祥公在五十八歲起這屋个時節，就想着愛特別講究屋場同建築。屋場關係着生活品質、身體安康，做事順序無？還有後代子孫个發展。建築講究安全、特色、文化，顯出主人个身份，屋仔个價值。愛仰仔正做得到這兜呢？就愛講究藝術、價值同精神、內涵，故所佢請該兩時當有名个建築師吳開、吳玄兩子爺起屋。
就屋仔个外部結構來看，包括本屋同虎片屋脣个細伯公祠（圖3）。客家人對土地伯公一等重視，不管田頭地尾、莊頭莊尾，哪仔就看得着「伯公」。就算係單家園屋，也會在屋脣立一座「伯公」來拜，保佑一家年年順序平安、五穀豐登。
圖3 虎片屋脣个細伯公祠樣貌，後背還有伯公樹，右片透化胎（2016.6.25攝）。
這堂「凹壽式」个伙房屋，後背引小楊梅山脈个龍到屋背化胎，表示背尾有靠山。化胎當闊，面前底下還保留客家傳統建築个「五星石」（又安到「五行石」），這下雖然無點香吔！毋過這在北部恁多个伙房屋來看，還異少看着（圖4）。
圖4 屋背後个五星石（2016.6.25攝）
五星石中央最大粒該位，通過阿公婆牌神桌下龍神神位个所在，透到屋个肚臍、外門，安到「分金線」，這肚臍也就係「天時坪」拜天公个位所。面對長岡嶺，看啊出去，後高前低，分出龍虎兩片對襯个屋場。化胎、一堂四橫、半月陂塘圍起來係一個圓个，包等四四方方个天時坪，形成一個「外圓內方」、「天圓地方」个圖式，象徵「陰陽合一」、「宇宙和諧」个意象，希望同自然結合，子孫緊來緊多，越來越發達。
正身中央該棟盡高，左右兩棟緊脣緊低。兩片橫屋乜共樣，緊外緊低，表示左右有序，前後有分。從外背看啊來，象徵「步步高昇」。主人講：「祖先當低調，來到楊梅，經過幾代个煞猛打拚，雖然有錢，在地有名望，也有功名吔！毋過無做官，做人做事愛有準則，故所毋敢恁閕掰，毋敢起翹峨。」
正身滿哪仔就係藝術、文化，在「凹壽」个左右各寫「忠孝」（圖5）、「廉節」（圖6），表示客人一溜裡來盡重視个「忠孝廉節」精神，希望子孫也愛時時做着。
圖5 左凹个「忠孝」（2016.6.25攝）。
圖6 右凹个「廉節」（2016.6.25攝）。
屋棟頂高貼有剪黏，水車垛、燦景都有交址陶，屋肚也有樹刻仔（木雕），門額、大門兩片、窗仔、櫃臺腳有石刻仔（石雕），兩片橫屋也有彩繪。兩片橫屋，龍片安到「餘慶居」（圖7），「餘慶」係從易經〈坤卦•文言〉「積善之家，必有餘慶；積不善之家，必有餘殃」這句引用下來个，期望屋下人、子孫定著愛「積善」，多行善做善事。
圖7 龍片橫屋（左護龍）「餘慶居」（2016.6.25攝）
虎片橫屋安到「耕讀居」（圖8），係傳承客人傳統盡重視个「晴耕雨讀」精神，除忒「耕種」以外，還愛「讀書」，正會有前途、有發展。
圖8 虎片橫屋（右護龍）「耕讀居」（2016.6.25攝）
毋單止恁仔，正身兩片个「窗額」頂背，毋係像一般人寫等「清風」、「明月」這兜，佢係用紅底陰刻貼金箔「橫經」（圖9）、「負耒」（圖10），特別打眼。「橫經」來自南朝梁个何遜《七召•儒學》个「橫經者比肩，擁箒者繼足。」橫經就係「橫陳經籍」，就係愛讀書。「負耒」來自《孟子•滕文公上》：「陳良之徒陳相，與其弟辛，負耒耜而自宋之滕。」「負耒」就係講「背等犁去做田事」。
圖9 正身龍片「窗額」刻「橫經」，表示要讀書。（2020.10.28攝）
圖10 正身虎片「窗額」刻「負耒」，表示要做（田）事。（2020.10.28攝）
再過來看這屋仔大門兩片係竹節窗仔，最脣項落峨間該兩片也有各設一隻細窗仔，安到「窺窗」（圖11），做麼个用呢？這窺窗外背看毋着裡背，裡背看得着外背。頭擺有妹仔愛定人，全靠媒人紹介，毋識看過細倈頭。愛定之前，媒人婆就會同未來个婿郎引到這片來，同佢打嘴鼓。屋下个婦人家就在細窗仔裡肚偷看，看有中意無？係有中意，就繼續下一站个過定。係無中意，就講今晡日無鬆爽，抑係仰般仰般？講一隻理由同佢推辭忒。
圖11 「窺窗」樣貌，位在「落峨」間位所，兩片都有（2023.11.04攝）。
一般客人个「天神爺」神位安在圍牆龍片，毋過這間黃屋在虎片，主人表示因為落來个路在虎片，故所田神爺安在虎片。（圖12）
圖12 安在虎片个「天神爺」，祈求「天官賜福」（2016.06.25攝）。
還較特殊个係屋面前該隻「半月塘」，比一般人家个較闊，講有六分地恁闊，安到「四水歸塘」！仰仔講呢？落雨時節，水落到正身、橫屋个屋簷水，加上天時坪个水，全部流到青龍片个「蝦蟆空」出去，再過流到陂塘，這係第一管水。
屋背頂高有一隻「泉水窟」，這泉水盡淨利，洗衫、洗菜全部在這位仔。洗好過後，這水流到第二窟，這窟係「牛汶水窟」。耕田人大家都有畜水牛，牛仔熱咧愛放落窟肚汶水，汶過以後，裡背肚斯有屎有尿，故所色較烏。過後就流落第三窟「禾筍窟」，禾筍吸收養分過後，就流落陂塘肚，這就係第二管水。
頂高安到泉水窩，頭擺吂有揚昇高爾夫球場个時節，樹林密密，有兜時斯種兜仔茶定定。該裡背當多泉水，泉水波波滾緊流，故所開一隻溝仔，同該泉水引到這陂塘來，這就係第三管水。
盡偎脣項个安到楊梅溪，在該片開溝仔，利用水圳蔭落來，這係第四管水。這四管水引到屋面前个「半月池」，就安到「四水歸塘」，這也係盡早个雨水回收系統。仰般講呢？屋脣所有个水都引到自家个陂塘來，落自家个田，全無浪費忒。陂塘闊六分，陂塘下有三甲田，兩分陂塘蔭一甲田，故所人講「山下屋，屋下田，私陂私圳蔭私田」，意思講「不假於人」，蔭田毋使經過別人个水圳。（圖13）
圖13 屋面前个「四水歸塘」半月塘，係盡早个雨水回收系統。（2016.06.25攝）
（本文吂完，9月初一請待續）
