曹操毋姓曹 關公毋姓關
【圖／廖千慧；文／何石松】
發音人：何石松（海陸腔）
明明曹操姓曹，關公姓關，仰般講曹操毋姓曹，關公毋姓關呢，該意思係講曹操雖然在生時節姓曹，但是，降佢介爺哀毋係姓曹；共樣，關公雖然姓關，佢介親生爺斯毋係姓關，為了逃命，正改姓關。這係追根溯源，深入探討歷史由來，了解雖然這下無共姓，頭擺可能共姓，大家還係一家親。有心，秦晉為一體；無心，肝膽變外人，不管你姓麼介，都愛互相痛惜，思量痛腸介意思。
曹操毋姓曹，係講佢骨底毋係姓曹。曹操，厥爸安著曹嵩，曹嵩係曹騰介養子，斯表示曹嵩原本毋係姓曹，係分曹騰領養以後正改姓曹介，曹操又係曹嵩介徠仔，自然斯毋係姓曹，該佢原旦姓麼介？原來，曹嵩係夏侯氏介徠仔，夏侯惇介阿叔，係講按照血脈來講，曹操原來係姓夏侯。不過，姓氏介產生，除了親生子跈爺哀姓以外，養子也係跈佢姓，所以，曹操，當然還係姓曹，係無問題介。
倒轉關公毋係姓關介問題較大，連佢介身世，也在一遍介濃濃濛煙之中，分毋清楚。關於關公介姓，有幾種講法：聽講關公細人仔時節，斯當有力，像牛牯共樣，又有正義感，在外背常常出事情，搣到爺哀愁勞博激，管到氣車氣急，一點辦法都無。一閼之下，斯摎佢關在屋下後尾介閒間仔，關久咧也平安無事。有一暗晡，佢想愛打爛窗門逃出去，突然聽著就近有一個細妹仔，嶄蠻悽慘介噭聲，也有老人家一片安慰，一片噭介聲音，一陣一陣傳來。不由分說，佢一下斯飛簷走壁恁遽，來到細妹仔屋下，問佢兜發生麼介事情
老人家驚到投佢講：「這係亻厓妹仔，已經定人咧。無胚著，縣大爺介阿舅，看著亻厓妹仔恁靚，強強愛討轉去做細姐，亻厓妹仔性情當烈，硬硬愛去尋死，亻厓無結無煞，去向縣老爺告狀，嗄分佢呵咄逐出來，看等就愛來迎娶，亻厓手扡扡仔無辦法抵抗，無奈何正噭到恁樣，這下，亻厓斯像『風吹芒婆－－無好靠』共樣啊！」關公聽著當閼，管佢星光半夜，黏皮擎起大刀直接來到官廳宿舍，手起刀落就摎縣老爺還過厥舅㓾死，遽遽尾瀉屎逃走。
因為人命關天，尤其係㓾死縣老爺，正經係摎天借膽，該還愛得？所以，下令摎關公畫像貼到滿天下，四處城門嚴格把守，風聲當緪，任你有翼難飛。關公看毋像勢，就到黃河邊，用泥攪水洗面，斯摎原來面色無共樣，打起精神，準備出關。城門衛兵問佢姓麼介，佢毋敢講出原來介姓，突然看著城門兩隻字：「潼關。」就講姓關，安全出城咧，從該以後，佢就用關做姓，無再過改咧。可見，關公原來毋係姓關。《三國志．關張馬黃趙傳》斯講：「關羽，字雲長，本字長生，河東解縣人。亡命奔涿郡。」亡係藏匿，命係名姓，亡命，就係改名換姓介意思。
也有人講關公原姓常，係解州常平村，姓常介打鐵師傅，在普救寺山門洞拈轉來介。厥爺哀因為苦，畜毋起，正摎佢掉忒。大咧以後，安名常生，後來因為有人霸佔水井，又強搶一位安到杏姑介細妹仔，就㓾死人，化裝易容，指關為姓。也有人講關公姓崔，係山西龍潭寺深潭肚，一條黃龍化育介細嬰兒，分賣豆腐介崔老伯收養。無想著，官廳嗄打死崔老伯，關公斯用大刀㓾死官府八十三儕，然後變裝逃亡，指關為姓。
又有人講，關公厥爸姓夏，係一位醫生。厥餔娘胡氏，因為生著當靚，硬硬分村中惡霸強強討轉去做餔娘，該下已經懷姙三個月，無幾久，斯降下細嬰兒，惡霸知這係姓夏介倈仔，吂滿月，就摎佢掉在大路上，分一個賣豆腐介關姓老阿伯拈轉去，斯跈佢去賣豆腐，難怪人講：「關公賣豆腐－－人強貨毋硬。」關公當好擎槌擎棍，相槌鬥打，厥爸就送佢去學打鐵等等。以上，全看毋出關公原來姓關，也還有儘多關於關公出世介傳說，比論講，關公係一條善良介龍轉世，從缽頭出世，從棺材出世等等，更說明了關公毋係姓關。
曹操毋姓曹，關公毋姓關，主要毋係愛強調佢兜姓曹抑姓關，最重要介係，愛了解姓氏來源多種，毋單係骨脈血親定定，還有儘多攬來介，逃命改姓介，各種姓氏變遷介，可以了解五百年前係一家，共飯甑。這下雖然無共姓，但有共姓心；無共家，但有共家情。發揮手足介同胞愛，更加親愛相惜相知，有思量，可以痛腸路上無共姓介嬰兒，攬轉一家親，正係曹操毋姓曹，關公毋姓關介內涵啊！
※本文的「介」為大眾通用的「的」，同教育部訂的「个」之意。
