做頭个人愛平心
【文／羅肇錦／國立中央大學客家語文暨社會科學學系榮譽教授】
發音人：羅肇錦（四縣腔）
廣東瑤族語喊自家个領導人安到tlau，廣東客人个祖先也喊自家个領導人安到talo，現下各地个客家人乜喊自家个長老安到「大老」。lo「老」這隻字（也係詞）在各地瑤語同客語全部係「人」个意思，「大老」這隻詞變化到現下臺灣客話，該就係亻恩兜講个「做頭个人」。做頭个人愛「平心」公正帶大家煞猛打拚，這支團體正會有和挼平安个好日仔過，故所做頭个人愛平心係社會團體最重要个事情。這種平心个領導大老，大到國家領導人細到家庭个家長，全部都做得用平心來帶領團體，係無恁樣平心對百姓，到背尾定著會搣到前世無修。
崖出世个社會本來還係專制个政府，毋過表面上又愛講係民主自由，故所早期社會當多虛虛假假無落無著，大家就跈等國之大老戇戇兮有飯好食就愛感心一代人。到崖出來做頭路該下，經濟改善思想變化，老百姓對人權自由平等个追求，緊來緊強，一黨專政个政府，想愛用無平心个統治來壓等制等老百姓，到包尾還係擋無歇民主平權个追求，臺灣政府正式進入政黨政治。進入政黨政治本來係民主過程良性競爭个好現象。吂知用選舉取得政權个結果，嗄變成本土同外來，統一同獨立，完全無共樣个意識型態个爭權。以吾个經驗來講，早期做毋得講方言做毋得講臺灣，開嘴眨目全部用國語講長江講黃河講秋海棠。結果十年河東，十年河西，莫笑窮人著爛衣。二十年前，反對黨取得政權，兩擺執政歸碗兜去食，又開始要求愛講台語，愛本土優先愛去中國化。連自家个根柢福建廣東都愛豁畀淨淨。文化祖先也做得避開，開嘴眨目全部就愛臺灣。像這種大老个心理，一息平心就無！愛樣欸帶領大家，分大家過和挼平安个日仔。做頭个人啊，正經係前世無修哦。
講到這位，崖淨講著傳統「士農工商」个「士」這一層个做頭人，毋過大老本來个意涵，係代表各個階層个領導人，毋係淨代表做官个「大人」。故所「士農工」這三種百姓係毋係有平心，還較係安定社會个基礎。
從細到大到老，就聽人講「大細目」，在屋下阿爸大細目惜倈仔毋惜妹仔，在學校先生大細目惜精个毋惜戇个，連毋係做頭个人也大細目惜靚个毋惜媸个。
當然大細目係各人个選擇同判斷，怪怨毋得。但係對做頭个大老來講，你就做毋得大細目。因為做頭个人，有權力有資源，分配利益資源該下，係毋平心去對待下背个人，該就會毋公平，搣到有兜人譴到抓壁探毋起頭，有兜人左右逢源暢到毋得天光。這就係農工商百姓，做領導个人愛時時記得若个平心原則。係毋平心去對待下背个人，該佢帶領个團體就會四四散散做毋出麼个好結果。該係做頭个人前世無修，正會出世生來大細目，看事情無公平，做出恁多分人怨、分人惱个事情。
總講一句，做大人、做大老、抑係做一般个做頭人，最重要个係愛有平心。平平就係人，樣毋用平平个心去對待。
※本文的「崖」同教育部訂的「亻厓」之意。
