中央大學電子報

客語關係句个表達方式

【文／鍾榮富／南臺科技大學應用英語系講座教授】

  客語書寫還在起步階段，現有書寫大部分都係「信手寫之」，乜做得講「手寫口講个話」，恁仰个結果，最明顯就係形容詞當少，語氣詞像「哦，吔、啊」當多。這種現象完全同早期華語白話文个演進發展，非常共樣。毋過，當時白話文个發展，除忒華文書寫个白話化以外，還有外國文學、社會文化、科學等等經典个翻譯，這就產生白話文另外一個借句來源，讓白話文个句子充滿了「歐化句」，其中到今還有人反對个就係英文關係句，像「那一道多彩繽紛、顏色萬千、時而浮動變形，時而光彩萬丈的彩虹，讓我著迷。」這中間个「多彩繽紛、顏色萬千、時而浮動變形，時而光彩萬丈的」原來就係(或者類)英文關係句个形式。
   客語在邁入書寫進前，平常客人講話都盡自然，當少修辭，就做得完全个溝通。但係講著書寫，大部分情況下，影響客語結構就係華語个句仔，比論講，客語「一…… 就」屬於英文As soon as…个句型，應該各語言就有自家个特殊性。平常客語用「V啊…就…」來表示，像「先生行啊過來，學生就恬靜下來了。」「窗仔打啊開來，就吹入來了」。恁仰个句仔，大部分後生人受了華語結構个影響，會講「先生一行過來，學生就恬靜下來了。」「窗仔一打開來，就吹入來了」。
  係準愛對英語直接翻譯為客語，挑戰更加多，這主要講關係句仔个翻譯，同時乜做得檢驗客語个个書寫同表達方式。先看下背英文劃線个句仔:

  But White Fang was to have no more than a nightmare vision of the city—an experience that was like a bad dream, unreal and terrible, that haunted him for long after in his dreams.

  若係照句仔翻譯，這兜劃線个部分，愛翻作「一個像惡夢，無真實又恐怖，連夢中都讓佢不安个經驗。」這就會出現歐化句型，讓關係句愛修飾个名詞，單獨出現在句尾，同頭前个形容詞離當遠。個人認為這毋係盡好个辦法，故所後來改做「白牙看著个，單淨係夢魘樣仔个都市縮影，這經驗就像惡夢，盡恐怖毋過毋係真个，這經驗可能在佢未來个夢中，還會繼續糾纏佢。」
  再過看一句：

  White Fang was to her a wolf, the hereditary marauder who had preyed upon her flocks from the time sheep were first herded and guarded by some dim ancestor of hers.

  這句比較起來，還較簡單兜些，問題主要在這兩個關係句兜，稍微較長兜些，故所在翻譯過程中，就愛注意著客家特殊个表達方式。照文字，可能會翻作「(野狼)就係攻擊佢个羊群，這時間對牧羊犬第一擺分人馴化个祖先開始。」恁仰个寫法，盡難看著整句个意思，故所個人想吔盡久，決定愛保存客語特色，翻作「對牧羊犬淵遠流長个祖先分人類馴養，讓佢等守護羊群以來，牧羊犬就認定野狼就係攻擊羊群个掠奪者。」