客家蓋惜你
【圖、文／徐佳妤／臺北市客語支援教師】
發音人：徐佳妤（南四縣腔）
「來哦！好食个米篩目哦！煞煞來買哦！」
這禮拜客語期末考，考試進前亻厓會帶等細人仔對頭到尾復習一遍，二年生个阿弘牯念到這句个時節，佢講：「先生，亻厓有一日發青瞑 講這句話。」「你發夢在該賣米篩目哦？嗯，你未來會做頭家哦。若姆聽著你發夢講客話？」「係啊，阿姆試著盡好笑。」阿弘牯係一個活跳个學生仔，蓋好搞亻厓帶个客語遊戲，搞到當興 个量時，就同客語詞語記入心咧，成時，堵著較難个詞語，佢還會自家寫注音符號在課本項，對低年生个學生仔來講，標音愛漸漸仔帶入去，最重要个，還係愛餳佢等學。
另間學校，有一個一年生个阿靚妹，佢盡畏羞，每擺堵著搞遊戲，大部分都係笑咪咪仔看等別人搞，雖然好多擺愛佢出來搞，總係拂頭講：「無~愛~」下後就無勉強佢咧，毋過亻厓會提醒佢，愛跈等其他个同學講客。會學期結束咧，亻厓講：「因為亻厓等學校有三個客語先生，下學年無定著毋係亻厓教个，同學也會無共樣，還係希望大家愛認真學客。阿靚妹，你愛大般 兜仔同大家共下搞啦。」看佢笑笑吔頷頭，亻厓相信佢會緊來緊進步！
有一個六年生个學生仔，佢係一個蓋認真个細阿妹仔，看厥字整整齊齊，舊年就喚佢參加字音字形比賽。因為暑假活動關係，佢無法度有恁多時間練習，故所每擺練習就愛有效率，亻厓分佢進度，有問題就問，閒常時就在屋下聽亻厓錄个音檔，聽核過寫，來學校訓練單淨就分佢寫考古題，對三十零分寫到有七八十分，落尾拿著臺北市第五名！亻厓同佢講：「你个煞猛占大部分，先生正𢯭手一息仔定定。」最尾一堂客語課，佢寫一張卡片感謝亻厓—啊，辛苦值得咧。
今晡日下課準備愛轉屋下，一個六年生个阿琳妺行入教室分亻厓一張紙，頂項寫等：「......過了盡久，亻厓正發現，先生你正經蓋辛苦，愛管蠻皮个學生仔，多謝先生个教導。」嗯，總算有學生仔看著先生个辛苦咧，短短幾隻字，嗄盡感動.....。亻厓講：「國中愛繼續學客哦。」佢頷頭。
祝福畢業个學生仔，客家蓋惜你！
________________________________________________
1發青瞑bodˋ qiangˊ miangˊ:睡夢中突然驚叫或說夢話。本文指說夢話。
2當興dongˊ him :興致正高。
3大般tai banˋ:大方。
