做阿公阿婆，阿公阿婆做
【文／彭欽清／國立政治大學退休教授】
發音人：彭欽清（四縣腔）
吾餔娘在臺北个醫院降大个倈仔，一禮拜出院就轉大湖做月，一滿月就帶去通霄分丈人老丈人哀渡，吾倈仔五個月，亻厓去米國留學會兩年，到佢愛讀幼稚園吔正同佢帶轉臺北來。
第二個倈仔乜係在臺北出世，該下吾姆七十零歲了，毋敢再過麻煩佢，一出院就帶轉通霄拜託丈人老丈人哀渡，會三歲正帶轉來自家渡。講起來就試著已敗勢，兩個倈仔亻厓飼無幾多擺牛乳，換無幾多擺尿布仔。
吾大个倈仔歇米國，2013年降一個妹仔，亻厓該年70歲，亻厓同親戚朋友講笑: 總算成“公”，吾當多小學同學就做幾下面阿太了，孫女對歲過正轉臺灣，第一擺見面。
2016年9月仔心臼降一個倈仔，吾倈仔喊亻厓兩公婆去同佢𢯭手做月，心臼國中畢業就跈爺哀去米國，過慣了西洋式生活，出院以後，無囥間角，䞚䞚仔走，還駛車仔哪就去買東西，訂个做月餐無麼个食，亻厓兩公婆下擺仔正會泡牛乳飼孫仔，換尿布仔。等孫仔滿月過，孫女三歲生日過忒，亻厓兩老仔就轉臺灣。
細个倈仔心臼同亻厓兩公婆歇共下，兩個都上班。前年8月仔降一個倈仔，兩子哀在做月中心歇一個月正轉來屋下。心臼請半年个育嬰假，亻厓兩老仔就見習愛仰仔泡牛乳過換尿布仔。
泡牛乳愛先同冷滾水烳燒到50度正來泡，又愛降溫到40度邊仔正做得飼嬰兒仔，有專用个電水壺仔，會自動調。尿布仔頭前个兩條黃色个線條係變青色就係屙濕吔，愛煞煞換，係無會發濕疹，故所愛巡等，係屙屎就較大勢，愛用濕紙巾同嬰兒仔个屎胐捽淨來。有一擺換等尿布仔，孫仔嗄又滮加一管尿，噴到亻厓一頭一面。
心臼半年个育嬰假煞了，佢兩公婆驚亻厓兩老仔一下仔接手，事恁多會忒悿，佢又請半年个兼職假，一禮拜淨去三、四個半日，雖然倈仔成時仔輪著尞會𢯭渡，亻厓同吾餔娘還係試著無恁該喢。驚無渡好，後生个會怪怨，三不二時還上網查渡嬰兒个相關資料。
嬰兒仔一肚飢、尿布仔一濕就就會噭，係尿布仔濕就愛煞煞換，係肚飢就愛遽遽泡牛乳，盡費氣係兩項共下來，先換尿布仔，正泡牛乳來飼，好得已搶乳，算好渡，等肚飽尿布燥，揇起來拍幾下仔又睡吔。毋過亻厓兩老仔分佢搣到上氣接毋著下氣。
對歲邊仔，孫仔抽著附近仔个托嬰中心，該下仔心冠肺炎當嚴重，又有腸病毒。倈仔心臼就遰著心冠肺炎，好得孫仔過亻厓兩老仔好好，毋過一禮拜做毋得去中心，該就正經係做阿公阿婆，阿公阿婆做。有兩擺，孫仔遰著腸病毒，有屙又翻，亻厓分佢遰著，好得兩日仔就好了。
細人仔總會有燒有冷，毋過看著佢作燒暈暈緊睡抑寒著緊嗽，兩老仔總係毋盼得會愁，望佢較遽兜仔好。
加個過月仔，孫仔就足兩歲吔。上隻月抽幼兒園，恁好彩抽著路頭毋會已遠个非營利組織个幼兒園，下隻月就愛自家揹書包仔了。
這駁仔熱𤐰𤐰仔，食飽夜亻厓兩老仔會渡孫仔去社區四圍个紅磚仔道項行行啊，毋會總係跼在屋肚，也較涼爽。看著有人牽等狗仔抑社區餵養个貓仔，佢會逐等去，看著有車仔抑odoby過，就會緊指，鄰舍看著會講佢恁得人惜，緊同亻厓兩公婆講還好命。
佢這兜看著个係得人惜个細人仔，毋過亻厓兩老仔想个係：做阿公阿婆，阿公阿婆做，做來歡喜甘願。
