人情好食水甜
【圖、文／黃美貞／臺北市光復國小教師】
發音人：黃美貞（南四縣腔）
承蒙網紅紹介「苗栗國」，戴在「天龍國」个好朋友一家人，提議愛跈亻厓轉妹家，因爭佢兜輒常行過，一直無機會去這隻所在遶尞。講來見笑，自家係苗栗人，除忒在苗栗讀到高中畢業，還在苗栗个小學仔教書兩年，打白講愛遊覽在地風光，亻厓確實想幾下日，落尾亻厓決定兩個主題，一個係傳統个客家美食，另一個係有名个打卡地點─好望角。
該日亻厓打早就䟘床，先去南苗市場買傳承三代个客家美食，像係粢粑、水粄、發粄、九層粄同豬籠粄。臨晝仔，朋友用google map合問路个方式，總算平安來到南勢坑黃屋伙房。一看著歸拖攞个客家粄，就目金金仔，亻厓一項項仔紹介這兜粄仔，像：發粄係掛紙愛準備个祭品，希望保佑子孫後代事業發達，頭擺有掛紙分粄个風俗，分越多粄仔出去，代表家運越旺，阿哥一直到今還會講起做細人仔該下，一聽著人掛紙个紙炮仔聲，會同伙房个伴仔共下去風水分粄仔，分來个發粄特別好食。水粄係細人仔盡好食个點心，做哀仔輒常一開火灶，秥米漿倒落去，用猛火蒸出一碗碗个水粄仔，無化學个東西，單淨炒筷菜末仔、蘿蔔乾定定，看著緊聽故事緊摎粄仔塞到嘴空个朋友，連阿爸就㖸出來哩。
食飽晝，阿哥沙鼻碌碌仔帶等大家去參觀菜園，佢講厥菜園係用共好个觀念來治理，揚蝶仔滿園飛，蟲仔乜在菜葉仔項廿廿趖，菜同草仔生到平高，故所菜同草仔輒常會分毋清楚，愛掊開草仔正摘得著菜。細人仔盡好挷蘿蔔仔，仰般擇著大條个蘿蔔仔斯愛有要領，頭下碼先拗腰看厥頭那有探出來吂，係探有手指公長，正堵好來挷。細人仔相賽比賽看麼人挷个盡大條，有兜仔使忒大力，嗄跕屎胐；有兜仔毋罅力，淨挷斷葉仔定仔。大人乜兵挷齒扯，拗菜筍、摘玻璃菜同結頭菜，裝到兩家濟仔淰淰正轉屋。
日仔，亻厓兜無時間去頭下碼計畫个風景區尞，試著異過意毋得，緊同朋友會失禮。無想著，佢還特別傳Line分亻厓，佢講：「其實，毋使特別安排麼个行程，屋下人个熱誠同招待，心肝頭就當燒暖了。」這就係老古人講个，人情好食水甜，有親身感受，就知得恁樣个感覺。
歸拖攞：guiˊ toˊ loˊ；一大串、一大堆。
頭擺：teuˇ baiˋ；從前。
風水：fungˊ suiˋ；墳墓；地理風水。
定定：tin tin；而已。
沙鼻碌碌仔：saˊ pi lugˋ lugˋ eˋ；得意，神氣活現的樣子。
兵挷齒扯：binˊ bangˊ ciiˋ caˋ；事情繁多、十分忙亂，形容忙得不可開交。
