含笑花
【圖、文／鍾孝昇／桃園市中壢區龍岡國小教師】
發音人：邱新春（四縣腔）
淡淡三月仔，無看著杜鵑打花在山排項，顛倒係一陣弓蕉香飄啊過來。行兼來看，正知係含笑花在日頭个照映下，半開半揞，摎甜滋滋仔个味緒，送入亻厓个眼前。毋單淨嚊著這花香，手指頭乜摸著厥嫩枝，感受著佢甜粄色个毛頂項，黏等淰淰个弓蕉油清香。含笑花，就係有這恁樣「人吂到，香味先到」个存在感。
含笑花係木蘭科植物个一種，原產地在中國摎東南亞地區。老古人講：「含笑花開不滿，若含笑然。」故所有這隻名。另外，又因爭含笑花總係小可仔開出花蕊，毋會大開，像愛笑又無講話這隻特徵，故所佢个花語有「含蓄」摎「矜持」个意義。
在屏東六堆地區个客家庄頭，輒常會看著含笑、樹蘭、夜合、桂花還有新丁這兜花種在屋脣，故所又有人喊這兜花係「客家五花」。客家詩人曾貴海就講：「跈等含笑、樹蘭、夜合摎桂花香，就尋得到客家人个屋，愛花香又勤儉个勞動民族。」
企到兩三公尺高个含笑花底下，分半大細个樹影𠖄等，堵堵好容納得下亻厓摎餔娘个形影，加上分大約半隻手巴掌大，粉白色个花包圍等，這情景分亻厓聯想起中壢客家女詩人杜潘芳格个這首《含笑花》：
倆儕共下食三餐／倆儕共下祈禱/倆儕共下去散步／倆儕共下睡目/
芬芳/你摘分亻厓个含笑花/你有來過亻厓个房間/
生生个含笑花/甜甜香香攬亻厓/
我家唔識斷香花/你亻厓唔識斷愛心
杜潘芳格先生用這首詩，寫出摎老公杜先生生活个般般回憶，今這下，杜先生既今過身了，只伸一儕人食飯、一儕人散步、一儕人整理花園…杜先生毋單淨留著杜慶壽醫生送分佢个含笑花，乜摎醹醹个思念，寄語在這首短詩中，送分了天頂个佢。
行在滿奈仔都係弓蕉香个山路項，牽等餔娘个手，亻厓摎這首分人心愁个詩放下。這下，該當係感受著人摎自然合而為一个時節，正著啊！故所，亻厓嗄修改了這首得人惜个童謠，在山間吟唱著含笑花个花香。
「淡淡个三月天，含笑花開在山崎項，含笑花開在圳溝邊，恁清香啊！像客家个靚細妹。啊！啊！像客家个靚細妹。」
