想毋解
【圖、文／劉書瑀】
發音人：劉書瑀（四縣腔）
痛到企坐毋核。
毋知係哪爭差，盡有可能自家逐擺背痀痀，總無每擺就怨怪細孲仔還細愛人揇、求人背。
實在佇毋著，煞煞來去路口新開張个按摩店分人撨撨仔。
正開門个店仔肚單淨一位師傅，細倈人，這時節乜無法度好揀揀擇擇了，遽遽衫褲換換仔眠床項覆等。
實在係恬靜，除忒自家忍痛時个呻聲，就伸骨節拉動該下个噼噼聲。
有人入門了，打門聲、塑膠袋仔胥疏聲、扚瓦斯爐火著聲、行路拖鞋罅罅聲、掃地泥个嗄嗄聲……
應當係在該準備當晝个菜飯。
黏時試著安心輕鬆下來。
就像頭擺讀書時節，亻厓在樓頂寫字，阿姆在屋下煮飯，擇菜、洗菜、切菜，成時會在砧枋底下墊一垤面帕剁肉，不時有聲音透往上，心肝肚試著異定貼，盡難忘个係下擺傳來个蘿蔔湯香味，上桌前加添該把櫞絲个噴香。
想著該央時盡惱食便當，表示阿姆加班無閒煮飯。
師傅開始撳頭那吔。
實在痛到喊毋敢，失神个時愐著一段話：「人係毋知仰般該下，無法度噭，就只能夠笑咧。」。
還在該苦笑，「叮咚」一聲，人客上門，店項鬧熱起來。
異好異好，做得分心一下。
阿姆哀，正經毋知係來花錢賺痛係無。
