0205十五暝
【圖、文／江卓安／國立中央大學客家語文碩士班】
偷偷仔同大自家講，今晡日係印尼个大節慶，係印尼人講个「十五暝」，乜係客家人講个「正月半」，在這日，客家人食等粄圓个時節，印尼个人敢係共樣食等粄圓呢？
當然毋係，印尼爪哇一帶，在正月半會食等一个當有地方特色个料理，該名仔就安到「十五暝」，印尼話安到「lontong capgomeh」這个料理就係當有印尼風味个料理。在這位做得名詞解釋一下，「lontong capgomeh」个lontong就係印尼話个飯糰个意思，摎這隻飯糰形投个東西，放到黃色个湯裡肚共下食，就大概係「十五暝」个料理。過詳細仔來講，「十五暝」會用當多个香料來做該淰黃个湯，講來生趣，東南亞地區料理就係放了當多个香料，好比講另外在東南亞乜當出名个巴東牛肉，就係用當多香料來妝點牛肉个，「十五暝」个湯係用香茅、七層塔等等个香料做出个，過加入當多配料，像飯糰、魯卵、沙爹、烰雞等等个東西，就係當代表个爪哇地區个料理，係講有食譜，還想學會來，在臺灣過重現一擺同大家分享。
除忒介紹十五暝以外，今晡日還過訪問了惠潮嘉會館个煮菜師傅，講起煮客家菜个師傅，大家定著想着个係客家人，毋過在印潮嘉會館，煮菜師傅係一隻在泗水土生土長个客家人，佢學習煮菜乜係對旁脣緊看緊看，有一擺試等煮菜就摎大家个胃拐走哩，今晡日去會館个午餐，乜係這隻印尼个阿叔佢準備、料理个，飲食組个大家乜問佢有麼个客家菜係佢做得同大家紹介个，該阿叔就同大家介紹吔梅干扣肉還過炆豬腳个食譜分飲食組个同學，在這做得分享个係梅干扣肉假使愛做个好食个話，在你做好，炆好該下做毋得馬上食，定著愛放過日正做得食，吾朋友講係愛暖過正好食，自家係試著愛放過日正食个作用係因為三層肉个皮愛變冷，正會變Ｑ，肉愛浸在滷汁肚，恁樣正好食。大家都係緊訪問，口涎水緊跌。
其他組有个係訪問青年部个成員，問佢兜有關客家傳承等等个問題，宗教組係散會以後轉到鳳德軒去參觀，佢兜還體驗了十五冥个民俗祈福儀式，實在還特別，這做得相比个係，先生講在山口洋个十五冥共樣盡鬧熱，該位个跳童會有遊行，乜共樣愛好好來慶祝這正月半个節日。所以，正月半還像係華人地區都會好好慶祝个日仔，過忒可能就係愛好好來上班哩，毋過客家人還做得放尞六、七日，因為有做無做，尞到天穿過！！
