楊梅泉水窩江夏堂建築个藝術風華（一）
【圖、文／徐貴榮／國立中央大學客家語文暨社會科學學系兼任助理教授】
發音人：徐貴榮（四縣腔）
在楊梅南片个小楊梅山下，也就係揚昇高爾夫球場下來，楊梅地政事務所面前个校前路428巷下去，右片有一間乜係黃姓江夏堂个伙房老屋，過再下去偎左片一條細路仔落去，兩片竹林圍圍揪，也有一間黃姓人家，人講「泉水窩江夏堂」。這棟伙房老屋，一堂四橫，非常个無簡單，係一堂後背有小楊梅山做靠山，面前有半月池照映，交椅窟个地勢，五虎下山个結構，尊卑有序个倫理建築。毋單止恁樣，厥个建築藝術就更加不得了，除忒木雕、石刻、剪黏、交趾陶、泥塑這兜以外，還有彩繪、湘繡、書法。在臺灣客家住居建築來講，怕無幾多哦！（圖1）
圖1 楊梅泉水窩江夏堂个建築形式、樣貌（2016.6.25攝）
從起到今，江夏堂有百空年个歷史，雖然經過歲月个洗禮，江夏堂个外觀，還係保持等當年个樣貌，分人一下就看得着早年客家个建築形式，想看啊當年「千頃第」个風光盛況。因為屋个歷史、藝術價值，家族个支持、同意，民國110（2021）年2月，分桃園市政府列為市定古蹟。開始整建半月池、圃園，希望下二擺提供分社區、學校參訪，做得做教材、教學園地，也做得做一個「樂活農場」。
可能有人會問，黃姓堂號「江夏堂」，也有安到「千頃第」。一看着「千頃」，黃姓又當大姓，就怕係當發、當有錢哦！毋過從厥大門對聯「江迴錦浪波千頃 夏繞薰風扇一枝」來看，過較深兜仔落去了解過後，其實這「千頃」係講東漢時節，有一個人安到黃憲，十四歲學問就當好，品德又高、當有氣度，受着當多人个尊敬。阿腦佢講：「汪汪若千頃波，澄之不清，淆之不濁」。傳統个價值觀，毋係講在該比財富，也毋係講有「良田千頃」个意思，故所講「錦浪波千頃」。黃姓還有一個了不起个人，係熱天撥扇涼蓆个二十四孝黃香，故所下聯講「夏繞薰風扇一枝」。
這間江夏堂仰會起到恁有藝術風華呢？這愛從來台祖講起。來台祖15世其輝公，乾隆16（1751）年，25歲從原鄉廣東省嘉應州鎮平縣樟坑仔水汴頭下黃這隻所在過海來台，到諸羅（今嘉義）縣蘆竹湳一搭仔做工絡食。長子台生公在乾隆42（1777）年年下仔，23歲離開厥爸其輝公坐船來到崁頭屋（今永安漁港），順等社仔溪來到楊梅壢。13年過後，乾隆55（1790）年8月，35歲同墾首黃燕禮贌租鳥仔窩个田地來耕，也就係這下个燕仔窩，做黃燕禮个佃農。
台生公發現這搭地毋好，放忒贌租，改租林本源个土地，到42歲還係異苦，毋過當𢯭眾，到今錫福宮還有捐財物起廟个記錄。佢身體當砸，所有个田溝、陂塘、田駁，全部自家來。賺兜仔錢咧，到下析買地來耕。做人講義氣，慢慢仔開始做人頭，家族个地位漸漸仔建立起來，正有成果。厥爸其輝公在諸羅一搭仔毋好生活，背尾其輝公也帶等餔娘子女來楊梅壢偎凴台生公，故所族譜寫「其輝公派下」。（圖2）16世台生公在乾隆20（1755）年出世，道光6（1826）年72歲過身，恁樣看來，黃屋來楊梅第一代就打下基業。
圖2 「桃園縣楊梅鎮 鎮平黃氏其輝公派下族譜」頁66（2023.04.11攝）
台生公討林氏無降，從龍潭揇一個共樣姓黃人个細人仔過房來做倈仔，安到「均接」，討溫姓人，降廷華、廷捷、廷元三個倈仔。廷華從細頭腦就當好，科考功名做國學生六品銜，文筆當好，做教書先生，教當多人。到道光、同治年間，係當時楊梅壢个領導人。廷捷雖然無讀麼个書，毋過口才當好，連任二十五年个楊梅總理。廷元身強力壯，係一個打武个人，當會食酒，做人當慨，交當多朋友，人阿腦佢「黃三能武」。佢聯合各姓組織幫會，協助莊肚个治安，防止土匪來搶，也在新埔成立義民團，勢力當大。
家族、團體緊來緊大，兄弟做經理、頭仔，就緊買地，也參加、樂捐楊梅信仰中心錫福宮个起建。從廷元在光緒9（1883）年過身，享壽62歲來看，黃屋到日本時代之前，土地就買到當闊咧！從東片个二重坑到西片个三湖、四湖都有田地、埔園，故所日本時代起楊梅公學校過後，黃屋人當風神个講：「𠊎黃屋人个子弟去學校讀書，毋使行別人个田脣。」
廷元討彭氏，降七個倈仔，除忒長子繼祥、滿子貴祥細細仔過身無傳以外，分做五大房，分別起屋。大房成祥就係這下个八方園，二房英祥在楊梅國小脣項，三房清祥在燕仔窩，四房發祥在環南路，五房盛祥就起這棟泉水窩江夏堂。因為三房英祥參加科考有功名，向清朝政府追贈阿爸廷元个功名「皓封登仕郎」，故所阿公婆牌就用「十八世廷元公皓封登仕郎」傳下。
這五兄弟到光緒16（1890）年，集揪佛銀1480個銀，從陳娘添、陳長才、陳存石這兜家族項贖轉燕仔窩五十零甲个土地。到該下總算起來，土地、埔園有380零甲。到日本時代，楊梅黃屋做得講係家大業大，故所19世盛祥公起屋个時節，歸隻屋个風水、材質、樣式、雕飾，特別講究。這屋在日本時代大正7（1918）年開始起，到第三年，大正9（1920）年完工落成，到這下有103年咧！佢仰般个講究呢？
（本文吂完，8月初一請待續）
