六月六 曬紅綠
【圖／廖千慧；文／何石松】
發音人：何石松（海陸腔）
六月六， 曬紅綠，意思係講逐年過忒漚水介五月，到了當熱介六月六，愛摎屋下介衫褲襖婆，被骨蚊帳，甚至於書籍字畫，廟肚經書典籍，衙門轎圍儀仗，宮中龍袍衣物等等各種物品，全部拿出日頭下去，曬分佢燥，恁樣正可以避免蛀蟲，永保萋頭，所以講：「六月六，曬紅綠，毋驚蟲來毋驚蛀。」又講：「六月六，家家曬紅綠。」同時，還可化解邪氣晦氣。聽講頭擺宰相，在六月六生日時，突然展現靈光智慧，化忒所有介舊陋，勤政愛民，煞猛打拚。係更進一層介曬紅綠。
所謂六月六，曬紅綠，來源儘早。聽講兩千五百年前介春秋時代，周武王攻打紂王時節，大軍來到河南朝歌南片介牧野，無胚著，𥍉目之間，天烏地暗，喊頭大水，所有兵馬武器，涿著歸身流流，何況，這下又係「小滿江河滿，五月無乾土」介時節，逐日水浙浙介五六月，濕氣當重，麼介東西都臭翕臭翕，當難鼻。
難得等到六月六該日，一色青天，武王斯命令部隊，愛摎所有介衫褲裝備，尤其該幾下萬人涿溼臭脯介鞋襪衣衫長褲，被單大手巾等，加上就近介人，也共樣拿出屋下所有愛曬介衫褲，還有老人衫也拿來曬。吊介吊，搭介搭，架介架，一下就擺出到堆山塞海，青黃烏白，粉白黛綠，紅紅綠綠，在日頭花瞠啊去，正經係五光十色，多姿多采，金晶𥍉爧，實在鬧熱。愛在六月六，曬紅綠，該係因為六月六介日頭特別烈，所謂「六月六，曬死鰗鰍禾大熟。」「六月六，曬紅綠，田水能煮雞卵熟。」所以，從該以後，大家在六月六，斯愛曬紅綠咧。
六月六，曬紅綠，紅綠介範圍已闊，包含了曬經書。聽講頭擺唐三藏西天取經，海上翻船，經書浸濕，摟起來曬燥正能保存，就在六月六拿經書去曬。後來已多大廟也在該晡日去翻曬經書，六月六，又安到曬經日。聽講清朝乾隆皇帝，有一擺在揚州巡行，堵著狂風大水，衫褲溼淨淨，又毋方便用百姓衫褲替換，斯等到好天正摎佢曬燥，恁堵好該日係六月六，所以又有「六月六，曬龍袍」介講法。
六月六，曬紅綠，最主要目的就係，愛摎屋下鏖糟有濕氣臭翕介東西曬到淨利燥爽來，其實，係一種儘好介衛生教育。尤其大水過後，屋肚濕氣翕人，當多東西斯會生菇臭羴，為了避免書籍臭翕，生蛀蟲，就愛摎佢拿出去曬燥來，正會鬆爽，儘多人就六月六來曬書，所以，又安到「六月六，曬書日。」
六月六，曬衫曬褲，曬書曬畫，曬忒臭翕臭味，溼氣晦氣，使著空氣清新，伶俐開陽，其實，係一種形而下介做法，更有一種破除心中偏見，除忒無正介私心，晒忒該烏暗面，晒忒慍悴介溫痛，化忒思想介臭脯，行向正面介思考，正係一種形而上介境界！
聽講頭擺晉文公介宰相狐偃，本來非常勤政愛民，受著大家介安腦。尤其逐年六月六生日時節，文武百官送來當多珍珠瑪瑙介貴重等路，還祝佢福如東海長流水，壽比南山萬年松，慢慢仔，佢也試著，自家果然係才華蓋世，無人能比，嗄沙鼻起來，開始懈怠政務，大開大使，浪費八敗，全無關心百姓，使著大家對佢不滿。厥親家趙衰去勸化佢，毋單毋聽，還摎佢罵到腦溢血，硬硬閼死。
趙衰介徠仔趙盾係隻孝子，爺仔分丈人老閼死，忍等火氣，準備報仇。恁堵好，晉文公派狐偃去災區放糧，還講六月六生日時節一定愛趕轉來。趙盾準備好愛在六月六該日來報冤仇，這件事情也摎厥餔娘講，厥餔娘聽著，愛㓾亻厓爸，嗄戇忒一半，無結無煞，想著爺娘恩情大過天，所以，在六月五號就恬恬仔轉外家，將這件事情摎厥姆講。
趙盾發覺厥餔娘轉外家去以後，心肝不安。六月六朝晨，當在該像鑊嫲肚介蟻仔―煩躁到走投無路時節，看著厥丈人老帶等人馬，開容笑面來到屋下，還請佢兩公婆坐上橫頭，續等對大家講：「亻厓這擺去災區放糧，正知百姓過著恁艱苦介日仔，這係宰相介責任！難怪亻厓婿郎愛㓾亻厓，雖然有點過當，也係為國盡忠，又摎厥爸報冤仇，實在係隻孝子! 亻厓妹仔在重要關頭救了阿爸，實在有孝。你倆儕，有忠有孝，來受亻厓一拜。」晉文公所以能成為春秋五霸之一，狐偃大賢，功勞已大。
原來這段興家興國介反省，像六月六，心肝肚介日頭，毋單曬燥了幾多心情介臭餔，化解了幾多感情介臭翕。六月六，曬紅綠，曬出了淨利燥爽介清香，曬出晴空萬里介和諧，更曬出了智慧清明介一色青天。
※本文的「介」為大眾通用的「的」，同教育部訂的「个」之意。
