自然个道路
【文／邱一帆／國立中央大學客家研究博士班】
發音人：邱一帆（四縣腔）
祖先留下來个腳跡
毋使記才
深深刻在吾个腦殼
該位來，這位去个路項
有雨水開路
有花草帶路
還有暗夜个月光做伴
你唱歌，亻厓來和
毋使擎遮，毋使坐車
快樂向前行
向前行，毋好停
前途路光明
圳溝脣，田脣路
一條過一條
毋愁鴨嫲吮，毋驚蛇哥咬
快樂向前行
大路一條一條開
隔開亻厓生活个路線
生存个記憶
硬硬分人割斷
漸漸仔消失在子孫个腦版
有心个後生應承父祖个交代
想愛尋轉祖先个路
跳上馬路嗄慘死在輪仔底下
變做扁扁乾乾个孤魂野鬼
生活个天地
緊來緊狹
腦海个容量
緊來緊少
共伴个聲音
緊來緊細
單淨車仔聲
緊來緊大
亻厓正知
自然个道路
原來係恁樣自然
