童年
【圖／文／羅寶貴】
發音人：羅寶貴（海陸腔）
身為農家子弟，爺哀為着愛畜八個細人仔，打早暗轉無閒直掣，耕山耕田種菜賣做到兩頭烏。
吊尾錘个亻厓，就分阿哥阿姊渡，跈上跈下盡黏人。從細係噭包嫲，六歲該當時，佢兜講愛去賺錢，喊亻厓乖乖屋下尞，亻厓乜愛去，毋分亻厓跈就大噭，阿姊無奈何高不將分亻厓跈去。離屋家無幾遠个係畜雞仔个養雞場，愛用鐵絲紮成一隻隻个雞籠。這毋成事个老妹，還毋會做麼个，淨會𢯭手拿東拿西定。頭家娘看亻厓生着圓滾滾已得人惜又乖，特別煎卵分亻厓食，該卵香味緒一生人還記得。
有一擺佢兜趁亻厓睡目，偷偷走出去尞，醒以後無看着人，開始在灶下門口噦噦滾，噭到氣緲緲仔，地泥嗄踔出一隻大空，佢兜轉來喊亻厓毋好摎阿姆講，臨暗仔阿姆轉來看着問亻厓，目珠紅紅投阿姆。就摎阿哥阿姊罵到發臭頭。亻厓笑咧！正經係愛噭愛笑，鴨嫲打孔翹。前幾年二姊還講起這件事情，害亻厓敗勢到想尋空鑽落去。害亻厓著下驚乜佩服二姊恁好个記才。
雖然係吊尾錘，並無滿女滿嬌嬌个習性，從細愛𢯭手農事。山項種大片个朳仔園，四五點目𥉌𥉌分阿姆喊䟘床，行到山項去摘朳仔。到該已經天曚光咧。阿姆交代講：「擇大又亮成熟个，細粒澀澀个毋好摘，食毋得」。摎阿哥阿姊煞猛摘，張淰淰个菜籃，逐儕手項擐一兜拿轉屋下，愛整理過細粒忒媸个擇出來另外放自家食，靚个拿去賣較有錢。阿姆雙肩㧡等歸籃淰淰个朳仔，沿路賣到該三公里遠个竹蓮市場尋位仔賣，逐擺看厥㧡擔背影，實在還辛苦哦。阿姆食苦耐勞，省儉持家，堅毅付出為家庭个精神，輒輒分亻厓思愐當久當久。
三合院屋在半崎項，山腳下有陂塘，阿姆會喊亻厓摎細哥，逐鴨仔鵝仔去陂塘，逐擺順續在脣項戽水捉蝦公魚仔，搞到暢摸摸毋知好轉屋，但係有一擺看著一尾魚仔當大尾，想愛偎兼兜捉，腳一滑溜到水竇肚，毋會泅水就將會浸下去，細哥大聲喊人來救亻厓，堵好鄰舍阿哥看着，煞煞摎亻厓救起來。歸身溚溼，阿姆哀！正經挨著神頭咧，險險分閻羅王做妹仔哦。一路噭等轉，自然摎細哥分阿姆駡到當慘，換來另擺毋使逐鴨仔去埤塘乜搞水毋得哩。
毋知頭天个童年，有好搞就暢咧！哪知麼个無米落鑊，所費在哪个日仔呢？思念中當像看著一個細阿妹仔，著紅色个衫褲，分火雞嫲追个身影～
