0206美食之旅
【圖、文／江卓安／中央大學客家語文碩士班】
係講客家族群在東南亞个發展，定著同「蘭芳」有盡大个關係，蘭芳公司在東南亞開墾，分華人在東南亞有了厥个地位。
今晡日愛同大家介紹个主題，係卓安這組有關印尼客家飲食還過印尼在地飲食有關个文章，今晡日大家當晝就先來去一間安到「魚花」个客家餐館食晝，大家點吔盡多菜，有肉有菜，還像在過年个樣，大自家還特別在印尼這隻較多人信仰伊斯蘭教个國家，點吔一隻客家經典料理，安到「扣肉」，其實這就係爌肉，毋過這擺就無恁好哩，這擺同往擺無共樣，這擺無師傅做得分大家訪問，毋過食了恁多間在印尼个客家料理，發現着一隻當特別个點，就係因為係在伊斯蘭國家，做毋得食豬肉，故所這位个豬肉料理有一隻特點，就係當鹹，這隻原因可能毋係因為客家傳統个味緒：油鹹香。會恁鹹个原因可能就係同上擺訪問在會館个師傅共樣，會煮豬肉，毋過做毋得食豬肉，該味緒自家乜毋知，全部大概大概就好，故所正會恁鹹。講到這，大家試着煮菜个時節，愛食一口正係對食物味緒呈現个尊重，毋過大家試想看啊，屋下阿姆煮菜還像乜無恁樣緊試味緒，假使恁樣，可能煮隻年夜飯，大魚大肉，阿姆逐樣菜都愛試味緒，可能阿姆自家在灶下可能就食飽哩。故所印尼師傅連一擺豬肉都無試過，故所用其他个菜个比例煮豬肉，就有可能昶鹹咧。
當晝食忒客家菜，下晝大家就去了印尼實在有名个辣椒醬品牌「Burudy」个商店。講到這，就係今晡日个重點，這隻印尼在地品牌个創辦人，佢係華人，佢係對廣府來个，嫁分福建籍个老公，一開始大家毋知，係因為自家聽着創辦人講吔「椰城」這兩隻字，就同客家人盡有關係哩，無問毋知，一問就試着華人在印尼地區實在盡有能力，盡慶，做得做一隻恁大品牌聞名印尼，做得講：「昔有蘭芳，今有Burudy。」
最尾食夜个時節，印尼同學倩美帶等大家去食印尼泗水个高級餐廳，大家點吔一隻拼盤，頂高有當多个係盤仔，該係像印尼幾下千隻島个綜合，逐隻盤仔係有一隻特別个島个料理，有十五暝、有巴東牛肉、有沙爹等等个食物，大家食到肚屎都像有身共樣。今晡日訪問着Burudy係盡特殊个，這隻訪問乜做得分大家知講，優秀个華人毋單淨係在臺灣過中國，乜有盡多當慶个華人在東南亞大鳴大放。
