詩兩首
【文／彭欽清／國立政治大學退休教授】
發音人：彭欽清（四縣腔）
上隻月在面書收著葉秋菊先生个訊息，佢講民國九十年臺北市个義民祭，有一個細倈仔同一個細妹仔个小學生，朗讀亻厓寫个〈拜問義民爺〉這首詩。該個細妹仔係厥妹仔林映竹，這下在中央機關上班，定婚了。葉先生講係佢自家負責映竹朗讀這首詩个，佢試著這首詩已餳人目汁。
當時臺北市還吂成立客家事務委員會，有關客家个業務係民政局管。局長林正修係後生條仔，毋過盡把變，佢看著亻厓在臺北市客家文化季刊寫个〈拜問義民爺〉，就問亻厓講做得請兩個國小个學生仔，來在義民祭該下讀分義民爺聽無？佢講，恁仰義民祭就會分人試著係大人細子都有份个活動。
問題係原來个詩正兩十行仔、成百字仔定定，盡多兩分鐘就讀煞了。林局長拜託亻厓做得寫較長兜仔無？亻厓就同這首詩寫到愛幼又愛幼，描寫一個耕種人為著保鄉衛土，毋顧屋下人个勸話加入義民軍，結果在戰場項犧牲。盡尾寫了會六十行，三百大零隻字。
拜問義民爺
手擎清香，
誠心个來拜問：
義民爺，
你該央時
仰會恁煞？
仰會恁攉得落手？
明知這擺出門，
大體會有去無轉，
毋過
你還係行向戰場。
義民爺，
你愛踏出門該下仔，
若个餔娘，
若个子女，
敢無跪下來？
揪等若个手，
目汁濫泔个求你講：
莫去哪！ 莫去
顧好自家个屋，
耕好自家个田，
掌好自家个地，
一家人順順序序
毋係盡好！
閒事莫搭恁多哪，
大眾个事
敢有所爭你一儕？
莫去哪！ 莫去
義民爺，
你係毋係正經恁刻情？
餔娘子女个聲聲句句
你全無聽入耳。
㧡啊起擔頭
你目珠無𥍉，
頭那無斡，
跋腳就走？
抑係
囓等牙根，
忍等目汁，
你千毋盼得，萬毋盼得，
刻耐仔正走得開腳？
義民爺，
最尾來拜問哪，
你著傷橫到戰場
伸最尾幾口氣个時節，
係毋係有想起
家鄉个屋、
家鄉个田、
家鄉个地？
係毋係有想起
屋下个爺哀、餔娘、子女？
係毋係有想起
愛出門該下
屋下人个聲聲句句？
義民爺 義民爺，
你係毋係？
你係毋係試著
盡痛腸？
民國七、八十年該下，臺灣當時行簽六合彩。盡多人哪就去求神問卜求明牌，想一下仔就有錢好抔到抔毋退。十賭九輸，當多人輸到毋擔輸贏，就尋神明出水，新聞講好多仔个神明分人擲到垃圾場，毋係斷手斷腳就係無目無鼻，有个還無頭那。連神明都敢動手个社會仰會毋亂，故所亻厓就寫〈求明牌〉這首詩來燒㸐當時人相賽癲六合彩个現象。
求明牌
做神明儕
愛較自重兜仔
無採亻厓撿恁多分你㘔痢肚
就淨分亻厓著著三擺二獎定定
幾千萬仔好做麼个
楔牙縫就無罅喔
你同亻厓聽真啊哩噢
這擺係再過害亻厓著該有个無个話啊
亻厓斯會變面喔
等亻厓膦火著起來
就同你
手腳剁下來
目珠挖出來
鼻公割下來
頭那劊下來
擲擲到垃圾場肚
亻厓斯講正經个喲
毋信你去垃圾場看啊哩哪
看分亻厓斬忒个神明有幾多仔哪
驚你恁老吔
目珠花花，桌布恅著菜瓜
亻厓同你配一付進口个目鏡
戴起來看較真兜啊哩喲
面前个號碼係會著啊
就聖筊
係毋會著
就陰筊
笑筊就毋使吔哪
麼个時節
你還笑得出來
就恁仔講喔
（硈喀）
