坐船望船走
【文／邱祥祐】
發音人：邱祥祐（四縣腔）
2023中大客語文學獎 客語散文類 佳作
斡頭想起舊年亻厓拿著一份活動簡章。先生講伸兩個禮拜這客語培訓个課程就愛舉辦了，做得來𢯭手無？無想忒多个亻厓接下這份工作，正知講這工作有恁大个挑戰。愐起這一年來个經驗，做得講係亻厓大學生涯裡肚盡難忘个一個挑戰，就像遊戲關卡「越級打怪」个樣仔，每隻關卡个關主都會生出無共樣个題目來考驗。
「坐船望船走」係坐船仔个人，希望做得順利出航个意思，就係講大家愛共心合作來達成目的。這一年來亻厓試著自家就像係在駛一條船仔，載等來學習个學員去認識客家世界个美好。這隻十分有挑戰性个計畫，就像在駛一條船仔，來學習个學員就像係船仔項个旅客，愛帶等佢兜行向客家个美好未來。
愛順利出航，當然毋單淨愛一儕人就做得。故所亻厓開始來招募工作團隊從一開始个幾儕人定定，變成愛 50 儕人个大團隊。大家都發揮自家个專長，有人負責整理文書、有人負責編教材、有人負責處理學務大細事、有人負責美術宣傳……，就像船仔項有船長、水手、電機員大家个分工合作、共同努力，正做得分船仔做得順利出航。每擺堵著新關卡，總會有人做得跳出來及時救援；每擺悿了總有人來換手分這隻計畫持續來進行，在這片亻厓毋會感覺著孤栖，因為大家共心，坐在船仔項，貢獻自家个能力，共心希望船仔做得順利來出發。
「船無方向難出港，人無理想難過江」，當感謝歸個工作團隊在共一條船項，為著个就係愛摎這活動辦理好勢，分旅客學員有美好个旅程。故所共心摎這活動辦理成功。逐擺有人會同亻厓講感謝你个煞猛領導，分這活動做得順利來舉辦 。 亻厓都會講其實愛感謝个係歸個團隊，係無能力恁強个團隊共下打拚，這個計畫定著毋會做到有這下个成就。「萬眾一條心，黃土變成金」感謝團隊肚个每一個同學，有大家个煞猛，正做得完成這恁大个挑戰。
包尾乜感謝自家接下這領導个任務。還記得有一擺大學一年生个學妹問亻厓：「學長你係四年生个無？」。亻厓試著已生趣做麼个會認為亻厓係大學四年生呢？原來學妹係無想著，竟然會係一個還吂四年生个學長，來帶領歸個團隊來進行這培訓課程，佢講真心試著佩服。學妹在講這句話个時節亻厓斡頭來想這一年个經驗大大細細个事情、酸甜苦辣都有，對一個還吂四年生個大學生來講，從一開始个三張簡章做起，做得引導大家同計畫變成這下个大規模，正式係越級打怪。毋過乜好得該央時个亻厓有勇氣接下這個計畫，這下想起來乜當感謝該央時个自家，因為有該央時个勇氣，分亻厓熟識當多个人，還分亻厓在大學个時節多修了一個安到 「領導」个學分 。
「水大好行船，人多好做事」，在駛船仔个過程，有你兜，真好。續下來，這條船仔還愛繼續前進，希望還做得藉由大家个能力，共同航向美好个未來、尋出還較大片个客家世界。
得獎感言：
「坐船望船走」是在說大家要同心合作來達成目的。讀到這個詞彙的時候，就想到自己在擔任計畫助理時，業務繁雜，但很感謝團隊夥伴們的協助，大家發揮各自的專長分工合作，同心為這個計畫努力，才能夠讓計畫這麼成功。也感謝當時大二時自己的勇氣接下了這個領導任務，讓自己能夠多修習一個「領導」學分，讓我成長許多，因此寫出這篇文章與大家分享。
