正來尞
【文／林苡嘉】
得獎感言：林苡嘉（四縣腔）
2023中大客語文學獎 客語散文類 第二名
正來尞，希望你做得再過來尞，希望做得再過摎你見面。
還細時節話著講「正來尞」就一定會有機會再見面，後來正知，講「正來尞」以後，有可能就無以後咧。有成時，有兜人，講過正來尞以後，就再過無機會見面咧。
讀高中該下，因為亻厓第一擺離開屋下去讀書，發生咧嚴重个適應問題，輒常需要其他人个𢯭手，班項同學還過屋下人對亻厓來講都係一種當大个壓力，故所大部分時間，亻厓係去尋先生摎亻厓𢯭手。雖然學校有安排心理師分亻厓，毋過毋辦法去尋心理師个時節當多，愛黏時有人摎亻厓𢯭手个時節心理師乜毋會堵好有時間，好得有一個對亻厓當好个先生，佢講个話對亻厓來講係當有力量个，故所亻厓輒常會去尋佢𢯭手，逐日都一定愛看著佢正毋會焦慮發作，故所亻厓當惱放尞，因為放尞就看毋著佢，看毋著佢亻厓焦慮症發作个機會就會提高。還過該央時吾屋下又有當大个改變，亻厓根本無法度承受恁大个改變，故所亻厓歸儕人都係因為有這隻先生，正做得好好留下來，好好過生活。
毋過佢摎其他个先生無共樣，學生仔畢業後係講想愛留佢个聯絡方式，佢毋會分亻厓兜。該央時亻厓高中既經愛畢業咧，結果續因為新冠肺炎，政府在亻厓18歲生日該日宣布全臺灣停課，亻厓係班項个副班長，宣布停課亻厓需要去做當多事情，根本無機會去尋佢。雖然講該段時間亻厓知自家愛畢業咧，讀大學以後可能當難做得看著佢，故所其實亻厓既經使咧當多時間，來去提醒自家愛漸漸適應看毋著佢个生活，毋過停課這件事情係亻厓從頭到尾都無想著个。
雖然亻厓既經提醒自家愛畢業咧、愛離開花蓮、離開這隻學校當久咧，突然愛離開學校，又毋知還做得再過轉來學校無，高中个畢業典禮也直接取消，亻厓个世界在該下完全崩忒咧。該日，亻厓還係硬尋一細段時間去尋佢，結果佢該下堵好無在座位項，亻厓正發現，上擺摎佢講正來尞過後，可能真經無機會見面咧。
過後，亻厓在一本書項看著一段話：「世界上有想見，毋過無愛見面較好个人，也有想見，續無法度見面个人，這隻世界，就係有恁多个遺憾。」亻厓這先生可能就係該想見，續無法度見面个人呢！
係講做得轉去高中盡尾一擺看著佢个時節，希望亻厓做得有機會同佢好好講一擺「正來尞」，感謝佢在高中時節个陪伴，希望講咧「正來尞」過後，亻厓就有機會再過摎佢見面。
「遽遽轉去上課！」亻厓已像聽著亻厓同佢講正來尞以後，佢喊亻厓遽遽轉去班項上課。
得獎感言：
高中个時節，亻厓个心理師識摎亻厓講過，佢認為亻厓做得寫出摎「講正來尞」這件事情有關个文章，還過，會寫到當好，因為佢認為這件事對亻厓个生命來講係一件當重要个事情。該央時个亻厓認為自家無恁有才調，毋過對「講正來尞」斯有當深个感覺，這係無法度否認个，故所心理師講个這件事情亻厓一直都放在心肝肚。
高中畢業愛兩年咧，心理師講个話還係不時會出現在亻厓个頭腦裡肚，經過兩年个大學生活，亻厓認為這下應該就係寫這篇文章最好个時間咧，故所就用這擺機會寫出這篇文章，紀錄一下對這感覺个想法。感謝客家系舉辦這擺比賽，乜感謝大家來看亻厓个文章。
