爆輪驚魂記
【文／陳淑美】
得獎感言：陳淑美（海陸腔）
2023中大客語文學獎 客語散文類 第一名
倈仔自舊年考著駛車執照以後斯當興旅行。有一日難得堵著好天又放尞，斯湊亻厓租一台車仔，兩子哀直直飆去花蓮尞。一路拿等地圖，看著哪位有生趣个景點，斯斡過去看一下。到第二日下晝愛轉台北个時節，經過秀林鄉，看著地圖町中橫公路肚有一隻「岳王亭」，想講奇怪，台灣摎岳飛有麼个關係呢？斡過來去看一下乜好。
吂知到該一看，還屙巴喔！斯一隻細涼亭企在該，旁邊立一支牌仔，頂高寫講起這亭仔係為著懷念民族英雄岳飛，頭前還有一座細吊橋，其他麼个都無。仰般想都毋了解，在台灣个中橫公路肚思念九百零年前中國北方个岳飛，到底有麼个搭碓？看一下天色會烏咧，還係煞煞來轉較贏。 兩子哀順等中橫公路駛向花蓮方向，兩片山壁頂个細石牯一路緊跌，路面滿哪都係跌下來个細石牯了了，試著當危險。斷真，在經過一隻細磅空个時節，好點點聽著「碰」一聲，車仔跈等顫一下，續下來斯感覺車底怪怪，像有東西卡著樣，又毋敢黏皮停在路中央，斯慢慢仔摎車駛出磅空口，煞煞在路脣停下來檢查看啊。阿姆哀！車仔爆輪咧！這下死無命咧哪！在這山林壁壢角的位所，愛去哪尋人來整車？
遽遽打電話分租車公司，好得佢兜當有經驗，問清楚以後，喊亻厓兜毋使緊張，佢會聯絡保險公司在花蓮个整車師傅過來處理，還特別交代亻厓兜毋使分整車師傅錢，租車公司會摎佢結算。對花蓮斡落來中橫公路肚，最遽乜愛半點鐘久，天一下斯斷烏咧，山肚無路燈，歸下暗摸胥疏，摸鼻空都毋着，路脣个山壁又不時緊傳來石牯跌下來个聲，砰砰滾，在暗摸叮咚个山肚聽起來，實在當得人驚。該載整車師傅盡遽斯拚到，手腳乜已溜掠，兩下半斯換好車輪仔咧。佢知亻厓兜愛趕緊轉去台北，特別交代做毋得駛昶遽，因為臨時換个備胎比另外三隻正常輪仔較細，駛忒遽驚怕無穩會貶車，時速最好毋好超過 70 公里。
好得花蓮人車較少，偎等路脣一路慢慢仔駛還做得。毋過駛到雪山磅空前个時節，路項个車仔開始越來越多咧。尤其係大貨車摎大客運，一輛飆過一輛，儕儕都恁趕時間樣。亻厓兜順等外線車道慢慢仔駛落雪山磅空，想講恁樣較毋會塞著後背車个路。無想著一駛落磅空肚，後背遠遠一台大客運緊駛緊兼，還一路喇叭撳無停，兩隻大車燈緊𥍉，車頭一下仔斯飆到強強會唚著亻厓兜个車尾咧，還緊催油。看等斯像會分佢輾過去樣，亻厓心肝肚緊顫，想講這擺斯正經死無命咧！早知就無愛斡落來看該麼个岳王亭，好死毋死去堵著這兜衰漦事！毋知還有機會看著韶早个日頭無？亻厓喊倈仔駛較遽兜，看做得拂忒後背這台催命鬼無，倈仔講佢已經加速到 70 公里咧，係過較遽驚怕會貶車。看佢像無事樣，順手撳一下雙黃燈个開關，兩隻後車燈開始一路𥍉啊𥍉，車仔本本走70 公里个龜速。
講乜奇怪，自車仔𥍉雙黃燈開始，後背該台催命鬼嗄像看著鬼樣，黏皮慢速下來，離亻厓兜个車仔緊來緊遠，到尾來斯伸遠遠看著後背兩隻大車燈緊來緊細隻，細到強強會看毋着咧。一直到亻厓兜車仔駛出磅空前，後背全無半輛車仔偎兼來，還爽哪！毋過等到車仔一出磅空口，後背又連等 20 零台大貨車摎大客運像拚命樣，通體斡過去內線車道，開始一輛超過一輛，一路飆等走，一下仔斯全無看著半點魂影咧。 亻厓問倈仔仰會變恁樣呢？佢講「𥍉雙黃燈係表示 俚車仔有問題，請後背車愛細義」。原來這雙黃燈恁好用喔！該佢兜仰會等到出磅空正來超車呢？倈仔講，因為在磅空肚做毋得換車道，乜做毋得超車。
兩子哀龜仔車慢慢仔趖，總算安全轉到台北咧。第二日去摎租車公司結算，公司講，車仔爆輪，一隻車輪仔2千個銀，公司負擔四股三，亻厓兜租車儕負擔四股一，算來還已和得喔！毋過一禮拜後，倈仔收著兩張紅單，理由全係「車速忒慢」，一張紅單3千個銀，兩張6千，抵得著三隻車輪仔咧！
得獎感言：
大家好，亻厓係陳淑美。
寫這篇客語散文做得得獎，除了愛感謝評審先生無棄嫌以外，另外還愛感謝一隻摎亻厓做伴當久个好朋友，該斯係「講客電台」。
其實亻厓个生活環境摎其他个客人完全無共樣。亻厓從細戴在學老莊，斯在屋下正有機會摎大人講客。到大咧嫁分學老人，還較無機會講客，看等強強斯會摎客話拂淨淨咧；好得前一駁仔毋堵好去聽着講客電台一個老人家摎一隻細阿姐在該溜客話，試著當生趣，對該時開始斯分佢著著咧，逐日一有閒斯上網聽佢兜打嘴鼓，正有今晡日這隻機會搶著這一萬個銀。
