楊梅三湖三元宮見證長岡嶺地區个發展（下）
【圖、文／徐貴榮／國立中央大學客家語文暨社會科學學系兼任助理教授】
發音人：徐貴榮（四縣腔）
新廟起過，耕田人還係愛用陂塘蔭水，還係長透會堵着旱害，生活還係十分艱苦。好得石門水庫完成過後，水利灌溉方便，毋使愁慮無水蔭田，天公有落雨無？過加肥料技術改善，使用肥料掖肥，收成越來越好。
工商緊來緊發達，到68年該兩時，人民收入增加，生活緊來緊好，就想愛重新起廟。經過幾下擺个籌備商量，正成立三湖三元宮重建委員會，由鍾松超先生擔任主任委員，恭請楊梅鎮長傅標榮先生主持動工典禮，在74年11月13完工，雕刻三官大帝金身三尊，到11月30舉行落成登龕大典。76年12月24、25（農曆11月初4、5）兩日舉辦慶成福醮（打醮），㓾豬倒羊，係長岡嶺地區有歷史以來盡大个盛事。
兩年後到78年8月，龍鳳樓牌樓完工落成（圖3），過後陸續起圍牆、錦湖亭、假山、水池、噴泉、拱橋這兜庭園造景，規模大約完成吔！就在該年10月13完工，接等屋頂琉璃瓦換新、正殿修整，盡尾到82年12月25、26（農曆11月13、14）兩日舉行慶成圓醮大典（打醮尾）。經過十過年，一座靚靚个地方信仰大廟完成吔！毋單係人心个寄託所在，也做得分地方人士坐尞、運動个好去處。
圖3 壯觀雄偉个龍鳳樓牌樓、闊闊个廟坪、側膁高高个大樹，做得尞涼。
（2018.11.29攝）
目前三元宮肚還有保留同治3年个香爐（圖4），宮前个「土牛溝」遺跡。土牛溝從湖口跈等楊湖路，一直透到二湖、陰影窩、營盤腳、高山頂、草湳陂到安平鎮，就在三元宮前，從路个南岸到北岸，毋過這下全變到路脣个水溝仔咧！（圖5）楊湖路四段92巷路脣，還有「土牛陂」个小地名做見證。
圖4 香爐前左片頂略略仔還看得出刻有「同治3年陽月置，中央刻三官大帝，右下析刻
大興庄眾信弟子仝敬叩」這兜字樣。（感謝該宮管理員提供，2023.05.02攝）
圖5 目前在楊湖路脣項个土牛溝
（拍攝地點：上湖派出所對面，時間：2023.05.02）
本宮服祀个神明除忒主神三官大帝以外，左片析還有媽祖娘、觀音娘、註生娘、地藏王菩薩，右手析還有城隍爺、五穀爺、伯公、池府王爺。故所本宮个祭典，逐隻月十六舉辦禮斗、祈安法會，同庄民起福求平安以外。逐年出年界過後，大約年初七、八欸，就會召集庄民去圓山溪南福龍宮、新豐中崙祖廟三元宮、新豐池府王爺池和宮，彰化南瑤宮、斗南順安宮、新港奉天宮、北港朝天宮這兜主要媽祖廟進香。轉來到麥寮拱範宮、鹿港天后宮、新埔義民廟，捩到大溪蓮座山觀音亭、東勢建安宮進香正回鑾轉宮，由花鼓隊親迎媽祖同眾神回駕。分信眾參香過後，正月十四舉辦閹雞比賽、起福、做戲，祈求一年風調雨順，五穀豐登，庄民安康，做事順序。到八月初十打新丁粄、做平安戲答謝神恩，同時跌筊仔選爐主，保留爐主輪值制度。這係一年一度該地區最盛大个「做鬧熱」，過去家家戶戶請人客。
長岡嶺頭湖到四湖這兜地區个人，除忒參加本宮一年一度个祭典以外，還參加富岡集義祠七年輪一擺个7月11慶讚中元，又同湖口共下，參加新埔義民廟7月20十五年輪一擺个義民節大鬧熱。對過去來講，在恁苦个所在，人民對神恩个熱情，到這下還保留等，年年傳承下去，實在無簡單。
到這下來，長岡嶺這恁多「湖」个所在，經濟變好，人民生活也進步咧！雖然還保留過去農村个特色，毋過當多「湖」囤忒，變到住宅區抑係工廠。楊湖路拓寬，高鐵經過，土地價格變貴吔！三元宮還係在地个信仰無變，見證當地个發展。
（本文个完成，感謝本宮前總務，古國堂老先生接受訪問，參考張秋滿總編輯、曾德全、游素美文字編輯，2016年出版个《桃園市楊梅區三湖三元宮志》）
