荔枝惜花毋惜子 牛眼惜子毋惜花
【圖／廖千慧；文／何石松】
發音人：何石松（海陸腔）
荔枝惜花毋惜子，牛眼惜子毋惜花，意思係講荔枝一開花，斯開到滿園滿樹，垂椏垂桍，又多又靚，無想著用力過多，嗄無力好來痛惜果子，使著打出介果子比花較少；牛眼共樣也開恁多花，毋過，並無䟓工來照顧佢，花嗄溜忒當多，為了補救這個遺憾，所以打介子比花還較多。
這兩者，一儕花多子少，一儕花少子多，該係荔枝花雖然多，能打出介果子較少；牛眼花雖然少，逐蕊花打出介子較多，共樣開花結子，情況各有不同，並毋係講麼儕有惜無惜介意思，毋過，總係分人試著，荔枝惜花無惜子，牛眼惜子無惜花。有愛學習荔枝牛眼惜花惜子之心，推恩四海，來思量天下同胞，順佢天性，毋好強求，發揮各自特色介內涵。
雖然荔枝惜花無惜子，毋過，佢係人人好食介水果。毋單淨文學家蘇東坡當好食，連皇帝也當愛食，漢武帝還為了荔枝，特別起一間安到「扶荔宮」介宮殿，從該當時起勢，皇帝愛南方年年進貢荔枝，由於南北千山萬水，山路彎彎斡斡，為了驚怕時間長久，當遽蒂㪐殼燥，斯派飛馬星夜傳送，結果，人馬悿死，跢死當多人。為了食荔枝，害死人命，實在毋係仁政，所以，從漢和帝以後，就無過進貢咧。不過，四百年後，唐玄宗為了滿足好食荔枝介楊貴妃，又特別下令進貢荔枝，正有講「無人知是荔枝來」介詩句。可見，荔枝係仰般受著大家介歡迎。難怪，唐朝宰相張九齡斯講：「百果之中，無一可比。」無受著爺哀痛腸介荔枝，嗄受著全民介痛惜。
大家都好食荔枝，無愛去看花。其實，荔枝係當惜花介，荔枝花也當靚。荔枝花，淡黃色，花形當細，一開就濃濃靚靚，滿樹都係。一叢差毋多可以開三百枝花，逐枝又可以開三四千蕊，歸叢樹仔鬥起來就有歸十萬介細花，這兜花，在南風吹來，搖搖蕩蕩，晃晃槓槓，婆娑跳舞，實在有靚啊！荔枝花可以開已久，生到核核，不容易落花，但是，歸萬蕊花介荔枝，儘難打出歸萬隻荔枝，所以，毋係逐蕊花都會打子，差毋多十蕊花打一隻子定定，也有人用棍仔摎佢介花打忒，無愛打恁多子，正經係水果介打胎，使著果子斯伸十分之一定，難怪人講：「荔枝十花得一子。」正安到荔枝惜花無惜子。
有荔枝，斯有牛眼。佢介外型，摎荔枝已相像，毋過，佢生著比荔枝較高大，不論係崩岡石壁，抑係齋齋無肥介所在，佢也生到當靚。頭擺細人時節，屋面前一叢大牛眼樹，打著當結，亻厓長扯蹶在樹頂拗牛眼食，一日食到暗，越食越有精神，也毋會肚屎痛。聽講頭擺楊貴妃人無鬆爽，又食毋落飯，大臣就向玄宗推薦牛眼，無想著，貴妃食了以後，毋單人變當有精神，嗄當愛食飯，皇帝一下歡喜，斯摎佢安到桂圓，有「貴體平安，闔家團圓」介意思。
原來，楊貴妃毋單好食荔枝，也儘好食牛眼，當年不顧千里路遙，就係為了送荔枝牛眼。蘇東坡〈荔支歎〉就講：「十里一置飛塵灰，五里一堠兵火催。顛坑仆谷相枕藉，知是荔支龍(牛)眼來。飛車跨山鶻橫海，風枝露葉如新采。宮中美人一破顏，驚塵濺血流千載。」無想著為了愛食牛眼，幾多人介身屍骨頭末，橫在山林壁角介坑壢裡肚，淒涼孤魂難回鄉，還係深閨夢裡人啊！千年以後，還像人看得著該兜送牛眼儕，滮出介血啊！難免流出同情介目汁，可見牛眼受歡迎介程度。
牛眼毋單好食，又當補，使身體康健。《神農本草經》斯講：「久服強魂，聰明，強身不老，通神明。一名益智。」吳寶春還識用「酒釀桂圓麵包」，得著世界麵包大賽冠軍，牛眼，實在得人惜啊！大家安腦牛眼，嗄盡少講著牛眼花，難怪人講「牛眼惜子毋惜花。」其實，牛眼花當香，佢摎荔枝花共樣，細細蕊，白色，一枝可以開著幾下百蕊到幾下千蕊，嫲介斯佔百分之10到30定，但係，牛眼花當慶，佢一蕊花可以打10隻子，所以講：「牛眼一花出十子。」雖然花少，照常可以打出恁多牛眼，同時，牛眼花還可泡茶，係當好介飲料，還可做藥，做得醫糖尿病，雖然牛眼惜子毋惜花，牛眼花還係能自立自強，飲水思源都來毋掣，哪有怨嘆？
荔枝惜花毋惜子，牛眼惜子毋惜花，一儕像少女，好打扮；一儕像乳哀，當惜子。各有特色，各有成就，可以滋補養生，益智強身，係大家介心肝寶貝。千百年來，大家總知「一騎紅塵妃子笑」，毋知「飛馬死亡人民哭」，係講斯為了「宮中美人笑耶耶」，害著百姓「驚塵濺血流千載」，該就毋係惜花惜子介本意咧！
※本文的「介」為大眾通用的「的」，同教育部訂的「个」之意。
