火山爆發
【圖、文／徐佳妤／臺北市客語支援教師】
發音人：徐佳妤（南四縣腔）
無意間在YouTube看著一部微電影「你看，妳看」，分亻厓想起十過年前个事情。
還毋曾做客語支援先生進前，亻厓係一個教師助理員，工作內容係𢯭手身心障礙學生仔去便所、洗手、著衫褲、飼飯這兜照護。亻厓有服務過大腦麻痺(腦麻)、自閉症、過動症、龍骨必開(脊柱裂)个學生仔，拜六有時節愛去臺北啟智學校研習，因為這段个經歷，嗄成為亻厓生命肚个養分。
教客个第二年，開學第一堂課，亻厓分五年生个學生仔客語課本同CD，好恬恬吔，一個同學一拿著CD將佢準做飛盤擳，緊搞緊講揫兜了少話，該央時分佢搣到無結煞，落尾正知佢有妥瑞症合過動症，上課毋單淨坐毋核也會發出怪聲，亻厓知這係厥症頭，佢自家無法度控制，乜毋係特事个，決定分佢較多个學習空間，學幾多就算幾多。
舊年班項有兩姊妹來學客，有一擺下課，佢兩個人毋知為了麼个事情吵事，在教室肚逐來逐去，老弟同阿姊个作業攉在地泥項蹬，到了上課還毋得煞，兩個人強強愛打起來咧，亻厓趕緊擋在佢等个中間，講：「愛打就打亻厓好咧。」「先生，打你做麼个呢？」學生仔嗄㖸出來。亻厓講：「若係你兩儕，有一個人著傷，亻厓都毋盼得啊……。」下後，在教學組長同導師个幫助下，正越至了解學生仔个性體。
有个學生仔一聽著同學講無中意佢聽个話，就譴到鬚惹惹吔起戇面，火氣惹起來，緊踢凳仔噭到大嫲聲，同學安慰佢顛倒過壞，亻厓講：「分佢噭一下、喊一下。」火灰性个細人仔，正經噭過就好咧，毋過，有个學生仔係一譴會攉別人个文具同課本，該時嗄愛行過去關心佢，就無事咧。細人仔火氣一來，愛用無共樣對待个方式，每擺上課時愛分佢等表現機會。
兒童心理專家楊俐容先生講過一句話：「人个火氣無法度畀講服，淨做得理解同疏通。」對亻厓來講，每一個學生仔都係特別、獨有个，毋係吓？
【註釋】
特事：音ti sii；故意。
