0203文廟以及英雄紀念館還有博物館
【圖、文／江卓安／國立中央大學客家語文碩士班】
係講孔廟這隻位所，大家定著會同讀書想在共下，在泗水个孔廟，安到「文廟」，係講用印尼話來翻譯个話，就係「Boen Bio」，這名仔个由來可能同書院盡有關係，做麼个恁樣講？因為在印尼个歷史裡肚，學習漢文這件事情有一段時間係做毋得做个事情，因為該央時个政府希望華人都愛學習印尼个東西，假使無跈等這條路行，就係摎國家个發展阻擋忒，假使愛過簡單个來講這種事情个經過，就係大家輒常講个「排華」運動，就係摎華人个一切東西都趕出印尼，故所印尼个有兜地方个華人都毋曉得講華語，單淨知自家係華人。
這文廟个管理人先生乜係華人，就係對福建來个華人二代，因為佢經過該排華个社會風氣過後，乜毋曉得講自家个家鄉話，恁樣个情形在印尼輒常有，乜毋單淨發生在福建人定定，乜有客家人知自家係客家人，毋過開嘴講客話毋得出，臺灣个文學作家賴和个詩講个：鄉音逕自忘。有該一息仔共樣。
除忒去文廟以外，大家還到了一隻當特別个位所，就係鄭和清真寺，自家試著已生趣，印象裡背，大家都話著鄭和，也就係三寶，佢係在中國明朝下南洋个，佢較可能會信个係擎香拜拜个宗教，毋過在東南亞个歷史係講，三寶係信仰伊斯蘭教，佢下南洋个經過，還有鄭和在東南亞地區發展个故事，都有詳細記錄下來。
最尾，大家過去了一隻博物館加上一隻公園，因為這兩個位所係兩隔壁，故所做一擺紹介分大家知，這公園就係英雄紀念碑，博物館就係三寶瓏博物館，這兩位所定著係共下去，因為這兩地方都係摎印尼發展个歷史有關係，英雄紀念碑就係為著紀念在戰爭裡背犧牲个軍人，在地下室个三寶瓏博物館就係印尼話个「十」个意思，三寶瓏博物館個全名係：「Museum Sepuluh Nopember」就係紀念在1945年11月10日个事件。該日發生個事情大概就係講，在該日，因為印尼、日本同英國這三隻國家因為二次世界大戰个關係，就分英國當惱印尼，就在該日：1945年11月10日。英國愛報復印尼人，佢發動空襲，摎泗水打到綿綿，人民都盡壞過，這時節个軍人就出來對抗英國个軍隊，為著紀念這件戰爭，所以有了英雄紀念碑同三寶瓏博物館，今晡日係深入看印尼歷史个一日，再續……
