前世無修嘎？
【文／羅肇錦／國立中央大學客家語文暨社會科學學系榮譽教授】
發音人：羅肇錦（四縣腔）
客話「前世無修」「無才調」，做得背尾加一个「嘎？」（或係？），表示懷疑兼有否定个意思。故所「前世無修嘎？」「無才調嘎？」「前世有修係？」「有才調係？」就變到帶有「前世有修」「有才調」个意思。
毋過崖恁樣講，定着會分人笑「大戇錘」，該就用「前世有修」「有才調」就好了。失禮！大戇錘愛在這位講正經話，台灣客話正經無「前世有修」「有才調」這種褒人个構詞，就淨有「前世無修」「無才調」个貶義詞定定。
故所崖下背愛講崖碩士博士期間，修習學分撰寫論文个情形，算來係「前世無修」抑係「前世有修」崖乜分毋清楚。僅可同吾題目定名「前世無修嘎？」
先講師大碩士班修學分，面前兩年，一學期平均愛修十過學分，四學期差毋多三四十學分，還有伸下來个時間，就騎自行車去台大中文歷史哲學人類各系所个課堂旁聽，反正師大無課个時間就在台大這間教室舂到另間教室，聽得識聽毋識都無相關，先生毋會問你問題，也毋會點名喊你上台。顛倒正經修課較緊張，除忒課堂輪流報告以外，還愛導師時間繳驗一禮拜間，規定个古文典籍寫一篇讀書心得，當時規定愛看完个古文包含《詩經》、《四書》、許慎《說文解字》、司馬遷《史記》、《漢書》，全部係無標點个原文書、自家用紅筆緊讀緊箍，逐禮拜寫一篇心得報告。到博士班，要求愛箍完藝文出版社印个《十三經注疏》、還過四史（《史記》《漢書》《後漢書》《三國志》）、《說文解字》、《荀子》等自選專書，愛箍完看完正做得申請畢業學科考，取得博士候選人資格。
修恁多學分又愛旁聽恁多課程，又還愛撥出十過點鐘去兼課賺生活費，該央時个時間就驚一日四十八點鐘也毋罅用，哪還有像這下周休兩日，一學期六學分就滿足欸。比起來實在係天地之差，毋過今晡日恁仔个結果看起來係麼人前世無修，崖也搞毋清楚，故所崖講這係前世無修嘎？
再講教授上課个情況，當時有名个教授上課，無發資料，無用powerpoint，教室坐淰淰，選修旁聽還有兜企等聽課个學生仔。先生行入教室，拿出粉筆，就開始緊講緊寫，學生仔就緊聽緊點頭，還在字簿項緊聽緊紀錄。從頭到尾毋使掀資料看文獻，教授像會背樣仔，一路講等下。嘴燥食一口茶又續等講下去，等到鐘仔響，助教來收尾感謝，教授正結束這堂精彩个課。係講較後生个教授，就會先發佢準備好个大綱內容配合粉牌字，照厥大綱順序講下去，堵到疑問就停下來大家共同討論解釋，學生仔較有參與个感覺。毋過輒常會有假會好表現个學生仔，藉機會講到一大堆，佔忒大家聽課个時間。
名教授老教授後生教授，個個有佢舊時代个優點缺點，學生仔有專心聽課有好問問題，也係個個有厥看法作法，同今晡日个教授同學生仔之間，情況全無共樣，比起來還較係各有神通各有好壞。兩種情況看起來係麼人前世無修，崖也搞毋清楚，故所崖又講這乜係前世無修嘎？
※本文的「崖」同教育部訂的「亻厓」之意。
