客語个表達方法：英客翻譯札記 (一)
【文／鍾榮富／南臺科技大學應用英語系講座教授】
發音人：鍾榮富（南四縣腔）
客委會最近想愛將美國經典小說翻譯為客語，這係當大个試驗工作，理想可能主要想愛讓客語書寫提升，主要个目的係同寫作界宣示，客語實在乜做得用來寫小說。過去，常常提着个客籍作家，像鍾理和、鍾肇政、李喬、鍾鐵民、吳錦發等大家，主要還係用華語書寫，雖然作品中帶入了不少客家生活用語、對話方式，分讀者感受着客家文化，毋過大體來講，佢等个文學還係屬於整個台灣文學个一部分，當少讀者、評論家、研究者將佢等看做「客家文學」作家。
用「台語文學」來比較，真實客語書寫个文學成果，大部分還係集中在新詩創作，比論講黃子堯、曾貴海、張芳慈、邱一帆等等，佢等个客語詩寫啊當好，語言順溜、結構貫穿、意象分明，有兜詩作還帶有圖像效果。用客語書寫新詩，可能係因為新詩過短，用个詞彙、句法、表達方式等等做得設計安排。但係小說寫作無共樣，因為牽涉个範圍大，敘述、說明、解釋等等都對客語書寫有當大个挑戰空間。目前就小說創作來講，最有成就个還係甘耀明先生，佢雖然大部分寫作心力放啊在華語，但係有時還會寫出幾乎全部客語个短篇小說，採用个語言非常鮮活，加上息把个膨風口氣，讓客家庄肚个鄉土人物形象打眼、明顯，看來就像隔壁鄰舍个阿伯。
這擺選來分亻厓翻譯个作品係傑克倫敦个「白牙」(Jack London, White Fang)。傑克倫敦(1876-1916)係盡特別个作家，特別點在作品像「海狼」(1903) 、「野性个呼聲」(1904)、「白牙」(1906)、「馬丁伊頓」(1909)到今都還係當多人閱讀个文本，也分當多人認為係文學經典，毋過大部分个文學史都無將佢列入去，像在台灣(包括美國本土當多大學个英文系)非常流行个Norton版美國文學史，就無列入，可以講，半句評論都無。有息把趣妙个係傑克倫敦對寫作開始，就崇拜英國个小說家吉普林(Rudyard Kipling, 1865-1936)，雖然吉普林係英國第一个得着諾貝爾文學獎个作家，毋過後來个文學史對佢評論乜毋高。換句話講，普羅民眾心中个小說作品，只要好看，故事內容鮮趣、人物書寫看得識，毋使花特多時間去思考，可能就會通行，會受着歡迎。但係文學史家看文學有專門、特別个標準，這就毋係一般小民搞得清楚个唷。
「白牙」寫一隻狼个故事。該隻狼就安到白牙，佢有四分之一个狗血統，故所這隻狼代表野生(野狼)同家畜(狗仔)兩種血統、兩種生存環境、兩種文化內底个爭執。
翻譯過程中，對客語个句子結構同表達方式，有當多感覺。想愛透過這个園地，分期寫出來同大家分享看法。
