0204瑪琅、觀音廟、榴槤
【圖、文／江卓安／客家語文碩士班】
臺灣島內，駛車駛一點半鐘，大概做得對桃園駛到苗栗，做麼个會對交通這方面開始講呢？因為今晡日旅行觀察个主角毋係在泗水市區，係愛駛車大概一點半鐘到兩點鐘个位所，無毋著，今晡日个主題就係去之前電子報文章裡肚邀請著个鄭福運先生介紹个位所：瑪琅，英文來翻譯就係「Malang」。
朝晨因為驚塞車，故所盡早就出門，第一站係到了瑪琅个「客家福利基金會」，其實這講明來，乜係第一日在雅加達拜會个「印尼客屬聯誼總會」个分會，還做得同大家分享个就係，在椰城（雅加達）還過泗水个天時都還係盡熱，毋過到了今晡日个所有景點，都係盡涼爽个，完全毋會冷，還會試著一息仔寒，拜會瑪琅个客家福利基金會以後，就在該位食晝，來印尼恁多日，今晡日總算食着一項較有臺灣味个菜，該就係「炆豬腳」，該係該片个主席葉先生佢做个，食落去差一息仔目汁會跌下來，因為這幾日都係食印尼客家个食物，都無家鄉个味，現下總算係試着麼个係想念家鄉了。
到了下晝時節，大家到了印尼个「美濃」，做麼个恁樣講，因為啊，下晝大家就對瑪琅駛到了「Batu」，就係峇都，下午第一站就係到這位个觀音廟，裡背肚有盡多觀音像，這間廟係福建人起个，故所大家都用了自家个「客式福佬話」來訪問，到後來有一位阿伯，佢講佢係對梅縣徙來這个客家人，佢講峇都摎其他印尼城市相比，佢最好个就係峇都，因為這片个氣候、溫度實在盡適合人戴，故所佢選擇就在這戴了。在觀音廟肚，大家看見了盡多神像，毋過有一隻安到「cou kun kong」大家都盡無結煞，毋知該係麼个神明，結果一問之下，該係年底愛送个神，大家就知就係「灶君爺」，故所該拼音轉變中文，就係「灶君公」，實在還生趣。
離開觀音廟，導遊渡大家去遶峇都个市場，大家就自由活動來去買自家好个東西，亻厓兜人就來去買臭臭个榴槤，毋過第一家還像因為溝通無盡好，就還像大豬，分人騙了，一盒做得食个榴槤，單淨三隻，其他个竟然係壞忒个，還絕哦，亻厓兜毋甘願个過行去第二間問，結果買了一粒榴槤，比第一間个還較便宜，而且係好个、無壞个，毋過食啊落去，還像係無恁熟，故所無恁好食，盡想愛噭出來講：好食个榴槤仰會恁難尋。
這段旅程正過一半定定，精彩个部分在後背哦！
