𧊅仔、蛤蟆、蟾蜍
【文、圖／彭欽清／國立政治大學退休教授】
發音人：彭欽清（四縣腔）
原在在莊下大个細人仔，除忒摸螺挖蟹以外，還會去捉抑釣𧊅仔。就亻厓所知，客人無食蛇食𧊅，係講人食蛇食𧊅，就係講人合鬼毋相同。
捉著个𧊅仔係愛分鴨子食个。正捉轉來个細鴨子，愛分佢較遽兜仔大，正做得食粗个食雜，就愛分佢食來好，故所細人仔就愛煞猛去改䘆公、捉𧊅𧝫仔過𧊅仔改䘆公盡簡單，去糞堆抑屋脣較陰濕个地泥項改幾钁頭仔就有，捉𧊅𧝫仔乜毋會難，用撈仔去田項抑細圳溝仔肚撈撈啊就過詐。
捉𧊅仔就較艱辛，看著有𧊅仔，就愛跍下來，拱起手巴掌來揜，歸晝邊仔，捉無幾多隻，背尾，吾姆拿眠帳布過鉛線仔做一隻網仔，鬥一截細竹枝仔，已好用，一晝邊捉得著兩三十隻。
吾二舅日本時代跈吾姐公姐婆從苗栗一路焗腦焗到高雄，在旗山歇兩十年正搬轉大湖，吾表哥xidgie，大亻厓三四歲吔，看亻厓捉𧊅仔捉到恁艱辛，就教亻厓用細竹枝仔䌈一條線，同䘆公䌈在線尾，在田項抑圳溝仔這兜較多𧊅仔个地方去釣，兩下半就釣著幾下十隻。佢講南部人已好食𧊅仔，無論煮湯、炒、烰就好食。
捉著个𧊅仔愛先拌分佢勯勯，放在隨身帶等个網袋仔肚，正毋會飆走，一轉到屋下，就同這兜𧊅仔斫細垤來分細鴨子食，係無忒大隻，鴨子食到會挷頸。無論係䘆公抑𧊅仔，一倒啊下，鴨子就番仔撿著錫樣仔相賽吮，毋使幾久仔，鴨子就大到變鴨豚仔。
比𧊅仔較大个蛤蟆就已多人食，聽講炒𧊅絲、蒜頭、薑嫲，抑係煮薑絲湯都已好食。毋過吾姆毋敢㓾，佢講做細人仔時節看人㓾蛤蟆該下，蛤蟆个前兩隻腳會揇等刀仔，像求人莫㓾佢樣仔，佢看著就驚。
有一站仔，吾三哥尋頭路無麼順序，日時頭去做山事，暗晡頭會去捉蛤蟆。佢講去到田項，聽著哪有蛤蟆叫，就愛恬恬仔行過去，跈等用帶等个手電筒晟過去，蛤蟆會一下呆呆，就愛煞煞用網仔揜著來，放在腰仔項个䉂公肚。係好彩，一暗晡捉得著兩十隻，轉到屋，用水養等，天光過後，擐去街項个席麵店賣，逐家搶等愛，價數當好。
蛤蟆價數好，好食个人又多，就有人引進米國蛤蟆，比田項个蛤蟆大怕有兩三倍，會鑽地窿又會躍，故所畜个所在愛鋪塑膠布，還愛弇網仔，無會分佢溜走淨淨，叫个聲盡像牛仔叫。吾老屋成百米遠仔个田項有人畜，逐暗晡就吵到會死。
蛤蟆个皮亮亮，長年愛在有水个所在，做毋得離開水忒久。蟾蜍就無共樣，皮起一粒一粒仔，看起來已得人驚，做得在無水个所在跳來跳去尋東西食，大人會教細人仔講，蟾蜍有毒，定著毋好儘採去動佢。毋過，亻厓逐擺坐車仔經過頭份个斗換坪就會看著賣蟾蜍肉个紙擘仔廣告，問在地人，講毒拿忒个蟾蜍肉清涼解毒，做得醫這醫該，亻厓愐毋解醫學恁發達吔，還會有人信。
這下，田緊來緊少，農藥又用來多，𧊅仔、蛤蟆就罕得看得著了，下把仔轉老屋，屋面前个一大份田早就起販仔屋吔，屋背个路乜開到較大條吔，暗晡頭聽著个毋係車仔聲、odoby聲，就係對面鄰舍个kalaoke聲。就會愐起原在嫌吵个𧊅仔聲、蛤蟆聲，這下想愛聽就聽毋著咧。
