人生个第一擺
【圖、文／温育華／草漯國小教師】
發音人：温育華（海陸腔）
禮拜六朝晨，日頭略略照下來，鼻著屋面前毋知名个香花，一陣一陣吹過來，分人感覺著盡舒適。今晡日係盡特別个日仔，因為阿爸愛渡亻厓去釣魚，食過朝後暢捺捺跈阿爸，來到正目睡醒个河壩脣，阿爸無閒直掣拿出用竹仔做个釣梹，用釣鈎鈎蟲䘆，亻厓跈等拿起一支又細又長个釣梹鈎蟲䘆，想愛放長線釣大魚，摎釣索拂著遠遠个水肚，就恬恬等等魚仔食釣。
等歸半晝邊無一息仔停動，亻厓有點心急想換位所，換忒幾隻位所浮冇還係無動，氣噗噗問阿爸：「這條大河壩係無魚係無？阿爸 俚換位釣魚好無？」阿爸勸化：「愛較有耐心兜，等待正有機會，阿妹呀！戲棚下等久就係你个」講話時阿爸拉起釣梹，釣著一尾巴掌嫲大个福壽鯽，看著阿爸釣有魚，亻厓正有信心摎魚仔戰下去。
過幾分鐘浮冇有停動，這係亻厓第一擺釣魚，心情舂上跌落，五味雜陳，又驚釣無魚；又驚毋食釣；又驚分魚走忒；又驚……。手項揢等釣梹完全毋敢動，驚怕摎魚仔嚇走，感覺時間在這下頓恬無聲無哨，空氣乜凝涷。看著浮冇有向往下沉一下，亻厓遽遽拉起釣梹，盡驚食釣个魚仔走忒，「啊！」又分魚仔瀉走，失望个心情像跌落駁崁下，一時蹶毋上崎。阿爸緊笑緊安慰亻厓，後生人做事情毋好緊觸觸，定著愛有耐心正會有收成。
這擺亻厓毋敢大意，目䟓䟓看等水竇肚个浮冇，成時浮冇會在水面緊行；成時浮冇會分漂仔著（diau）著，看毋清楚魚仔到底食釣吂？到底在哪位？「釣著咧！釣著咧！」這係亻厓第一擺釣著魚，雖然係一尾細魚，毋過因為佢正做得增強信心。時間个浮冇一分一秒在該消逝，水竇肚个浮冇乜在該動啊動，魚仔有食蟲䘆，浮冇會動上動下，係歸群魚仔圍過來搶食，該浮冇停動還較明顯，成時牛筋線拉起來又食到淨淨。
問阿爸到底係仰般呢？阿爸講：「阿妹！釣魚裡背肚有盡多孔竅，該係魚仔在該試探，這時做毋得拉線，一拉線就會摎魚仔嚇走。」「啊！恁狡猾个傢伙，等一下定著愛釣大鯉嫲赴煮暗餐。」
這下恬恬企在柳樹下遮涼，過無幾久浮冇𢶀幾下，心肝肚愐想收釣个時節盡重要，做毋得忒遽乜做毋得忒慢，其中个奥妙愛有經驗過正會知曉。臨晝个日頭恁烈，照到頭那汗流脈落流無停，手腳強強會麻痺忒，浮冇還係無動，同魚仔做一場耐力个競賽。最尾浮冇分魚拉等走，著啊驚煞煞收釣，挽著一尾斤零重个鯽魚，這下換亻厓對魚仔講：「還係亻厓較有耐心。」
這擺摎阿爸去河壩釣魚，歡喜个毋係釣著一鍚桶个魚；歡喜个係學着人生哲理：「近水知魚性，近山識鳥音」，觀察細事情就知踪變化、學著要領，正識係：「愛捉大魚落大海，愛獵虎豹上山來」。
