楊梅三湖三元宮見證長岡嶺地區个發展（上）
【圖、文／徐貴榮／國立中央大學客家語文暨社會科學學系兼任助理教授】
發音人：徐貴榮（四縣腔）
楊梅三湖三元宮（圖1）位在楊梅區三湖里楊湖路三段600號，主神三官大帝，係楊梅西區居民个信仰中心，也係客人當普遍个信仰，祭祀圈包括楊梅西片析个長岡嶺同伯公岡（今富岡）兩大地區。
圖1 楊梅三湖三元宮現貌（2018.11.29攝）
根據「台灣舊地名之沿革」、「楊梅鎮志」這兜書冊个記載，長岡嶺係楊梅地區盡早開發个所在。早在康熙47（西元1708）年，長樂（今五華）客人古揚基（一作古安光）、古厚基、古尾基三兄弟就落來開墾吔！毋過無人知這三兄弟後來去哪仔？後代仰般吔？筆者在本報上兩期（418期4月初1出刊）个〈楊梅營盤腳古屋長樂客〉有一篇報導，指出係古達光在康熙46（1707）年從廣東長樂過海來到新竹。佢大個倈仔聲文公毋知去哪仔無記錄，第二个倈仔聲俊公在乾隆8（1743）年正出世，大約乾隆中期來到長岡嶺開發。毋過長岡嶺這隻所在當高岡，無水好蔭田又風吹牛鼻頭，正徙到這下安到上田个田心仔開墾，後來開出百過甲个田，變到上田地區个大戶，起有公廳傳到這下。這下長岡嶺个古姓，也係從長樂來个，毋過當慢，到道光年間，古慶雲、古祥雲、古壽雲三兄弟來台到楊梅。慶雲、祥雲後代搬到南投埔里去發展，伸壽雲公在這傳下來，佢兜並無起公廳。
長岡嶺這隻所在，總下全係看天田，愛靠開陂頓水蔭田，正會有收成，故所正會有頭湖、二湖、三湖、四湖這兜地名，這「湖」就係「陂塘」个意思。還過長岡嶺這所在个地泥全係紅泥圪仔，泥油薄薄，收成毋好，故所人民苦煎煎仔。毋過耕地有限，跈等來開墾个人緊來緊多，長岡嶺一搭子也緊來緊多人，雖然有幾隻大姓聚落，毋過大部分還係散村樣貌，講「海陸」，鄒姓還有家傳个「客家流民拳」。
清朝同治年間，長岡嶺地區堵着大旱害，無穀好割，頭湖、二湖、三湖、四湖、伯公岡、陰影窩（包括上下陰影窩）這兜聯庄个人，著等白衫、打赤腳，三步一跪、五步一拜，去到山崎（今新豐）中崙三元宮恭迎三官大帝聖駕分香前來。在同治3（1864）年設爐，並虔誠同三官大帝求雨，果然解除旱害，先民暢到奈毋得，過後逐年評筊選爐主輪值，照時祭祀。
因爭人心虔誠，神恩有靈，聯庄人士就想愛起一間廟來服祀三官大帝。同治8年，得着地方仕紳劉千貴、王華斌這兜地主个捐地，在這下个上湖派出所脣項起一間簡簡單單个泥磚屋做廟，服祀三官大帝令旗過香爐，地方人士安佢「三官廟」。日本時代後期，皇民化運動開始，禁止民間信仰，廟分佢徵收做講習所，廟坪做「上四湖派出所」。人民無奈何，同三官大帝令旗過香爐暫時迎到劉保正屋下服祀。
光復過後，恢復宗教信仰，原來个廟坪做派出所做忒吔！伸着个狹狹仔無罅用，風水也毋好。聯庄代表就在民國46年11月21得着地主个同意，47年5月共同聯名發起，同本宮從上湖里徙到這下个三湖里位所重新起過，由「許細苟」做籌建主任委員，「彭番、王漢池」做副主任委員，正做正身三間過兩片落峨，在民國48年10月12完工。並承蒙「吳永岐」、「陳立路」、「王國章」、「鍾王緞妹」、「陳林招妹」這兜地主共同簽寫同意書，無償提供新廟使用，樹立「三官大帝神位」神牌，改換廟名安到「三元宮」，信仰區還係原來个「頭、二、三、四湖」，「伯公岡，上、下陰影窩」這兜地方。(圖2)
圖2 楊梅三元宮祭祀圈、位置圖
（資料來源：「《桃園市楊梅區三湖三元宮志》頁64，改繪自楊梅區戶政事務所）
（吂完，下兩期待續）
