松樹燥死毋下水 柳樹浸死毋上山
【圖／廖千慧；文／何石松】
發音人：何石松（海陸腔）
松樹燥死毋下水，柳樹浸死毋上山，意思係講松樹摎柳樹這兩種樹仔，一種係種在山頂，毋驚旱，也毋驚冷，一年四季，在山頂企到竳竳，毋會悿也毋會渴，當增志，就係燥死佢也毋下山，係仁愛介代表。該柳樹好戴在河壩漘，陂塘唇，毋驚水毋驚熱，長年透天，可以企在河漘，婆娑跳舞，毋會懶也毋識喊苦，還開容笑面介摎人揲手，就係浸死也毋去上山，係智者介象徵。
這松樹，本來種在哪位都會生，係當認份介樹仔。自從羅隱講句話以後，佢就戴在山頂無愛下山咧。聽講頭擺，羅隱在松樹下坐尞，褲分松油黏著，䟘起來時節，褲嗄扯爛忒，佢當閼，斯講：「松樹椏，松樹椏，你萬古千秋都毋會生芽叉椏。」想想仔，山頂當會落水，常常起火毋著，又愁厥姆無松樹樵好燒火。遽遽又講：「松樹你，風吹松子滿山生，松樹飛子成樹林；松子開花蓬蓬塵，吹到崩崗石壁變成林，分亻厓姆檢樵毋使水涿水淋。」正經，「松花落地，滿山都係」，所以，松樹斯一直在山頂，無愛下山咧！
松樹毋單耐霜耐雪又耐旱，就係瘦浹浹介山頂，山林壁角介崩岡，齋儸儸介石壁，樹仔都種毋起來介位所，斯愛種松樹，照常可以生著當高當大，濃濃靚靚滿山青，也毋使愁愛仰般種，斯摎該松子滿天去委，不論崩岡高崁，全部會生。松樹當團結，佢愛摎大家擠共下，尖到越密，樹仔就生到越高，加上佢壽年特別長，所謂「千年杉，萬年松」，有松樹介山頂，必定四季長青，難怪吾俚摎人祝壽時，會祝福對方「福如東海長流水，壽比南山不老松。」原來松樹「仁者樂山」，能夠「仁者壽」，毋係無原因介。
松樹毋驚水來無驚燥，毋驚雪來毋驚霜，又能夠萬年長青，所以，大家都當愛種松樹。宋朝蘇東坡斯當愛種，還將種松樹當做自家介倈仔共樣，當惜佢。佢將松樹摎倈仔融為一體，認為係人才介象徵，靈氣介展現。佢在〈種松得倈子〉這首詩就講：「山僧老無子，養護如嬰孩。坐待走龍蛇，清陰滿南臺。孤根裂山石，直幹排風雷。我今百日客，養此千歲材。」對佢係仰般介期望能夠達到孤高正直，恩澤蔭淰御史臺！可見這千歲材介松樹，燥死毋下水，係一生人介堅持啊！
松樹，正經係燥死毋下水，再來看柳樹仰般浸死毋上山？聽講柳樹，原來係生在山頂，自從分介之推兩子哀攬等，分火燒死以後，第二年，晉文公上山，發現舊年燒死介樹仔，斯柳樹生出新芽定定，佢就拗兜柳枝轉去插在門前，第三年就拿轉去種在有水介地方，從此以後，路邊河壩漘，就種當多柳樹咧。係講早兜仔有這介水，就可以救著介之推介性命，可惜啊可惜，這下，亻厓就係浸死，乜無愛過上山，去看該傷心地啊！水，就係亻厓介性命，毋當斯在這水邊，愛摎水共下來救蒼生，來創造更幸福介生活。
不論春天抑係秋天，柳樹斯會帶來詩情畫意，溫柔多情介人生。看該「堤邊柳，到秋天，葉亂飄」「年年柳色，灞陵傷別」介離情憂傷。看該「草長鶯飛二月天，拂堤楊柳醉春煙」介美景，「楊柳青青江水平，聞郎江上踏歌聲」介活潑多情。《牡丹亭》肚，該柳夢梅發夢，夢著在河漘柳樹下遇著杜麗娘，特別改姓柳，可見柳樹介魔力，該河堤漘介柳樹，當當散發出青春快樂介人生。柳樹開始在有水介位所，付出佢對人類介感情摎貢獻。
聽講宋朝時節，西湖天旱無水，有人講愛廢西湖。蘇東坡黏皮上表皇帝，千萬做毋得廢。解決介方法，就係摎湖底介泥仔挖起來，築一條長堤，兩片種柳樹摎桃樹，因為柳樹毋驚浸，可以保護水土，毋會崩坎。毋單縮短了南北來往介時間，還成就了西湖婀娜婆娑介美景。所以人講，西湖介靚，靚在柳樹。叢叢柳樹，係一首詩，烟柳畫橋，綠烟紅雲，白鶴飛翔，加上鏡鮮水面，正經係人間仙境，溫柔湖水，多情柳樹，仰般會還想愛上山？
千百年來，松樹斯摎青山融為一體，幾多徂徠山泰山介松林，黃山迎客松等等，毋使下水也毋會燥死；柳樹也摎綠水繳繞到共下，幾多西湖介烟柳畫船，陂塘漘介柳浪婆娑，毋使上山也毋會浸死。這係一生人介堅持，「一叢松樹一枝遮，一叢柳樹一眼泉」，松柳兩儕，一山一水，使著山頂毋會光，山下穀滿倉，表現仁智胸懷，澤蔭天下，係「松樹燥死毋下水，柳樹浸死毋上山」介真正內涵。
※本文的「介」為大眾通用的「的」，同教育部訂的「个」之意。
